Turun ilk oyununda Bakı təmsilçiləri qarşılaşdı. Komandaların bərabər xala malik olması oyunun gərgin keçəcəyindən xəbər verirdi.

“Neftçi”nin ötən tur Tovuz səfərindən 1 xalla qayıtması, “Səbail”in isə evdə “Sumqayıt”a məğlub olması onları qələbəyə oynamağa məcbur edirdi. Axı hər biri mükafatçı yerlərə iddialıdı.

Adətən, ilk yarıda passiv təsir bağışlayan “dənizçilər” bu dəfə də ənənədən kənara çıxmadı. “Neftçi” isə matça nəzarəti ələ almağa çalışırdı. Elə ilk təhlükəli vəziyyət də meydan sahiblərindən gəldi. Ozobiçin qüvvətli zərbəsi qeyri-dəqiq oldu. Təzyiqi artıran “ağ-qaralar” cəmi 2 dəqiqə sonra yenidən qapını yoxladı. Bu dəfə Rəhmanın zərbəsi yetərincə təhlükəli alındı. Səlahət isə diqqətli oynayaraq topu dəf etdi. Elə bu hücumun davamında Rəhmanın künc zərbəsindən cərimə meydanına göndərdiyi ötürmə qapı önündə yaranan qarışıqlıq nəticəsində qolla nəticələndi. Belə ki, Azərə toxunub istiqamətini dəyişən topu Boqomolski çox da qüvvətli olmayan vuruşla qapıya göndərdi. Alluş təhlükəni uzaqlaşdırmağa çalışsa da, Bardeaya tuş gələn top tora qovuşdu - 1:0. Qoldan sonra daha da ruhlanan meydan sahibləri cəmi 3 dəqiqə sonra fərqi artırdı. Matiasın qapı qarşısına asmasını Azər dəyərləndirdi – 2:0. Bir qədər sonra “Neftçi”nin ifasında növbəti təhlükəli vəziyyətin şahidi olduq. Komandanın ən yaxşılarından olan Lebonun ara ötürməsindən sonra Boqomolskinin qapı qarşısına göndərdiyi top Adilə toxunub, istiqamətini dəyişərək “çərçivə”yə getdi. Amma Səlahət bu dəfə sayıqlığı itirmədi. Diniyevin yetirmələrii ilk real qol vəziyyətini 36-cı dəqiqədə yaratdı. Alluşun ötürməsindən sonra Pedro iti bucaq altından sağ “9-luğ”u yoxladı. Bu dəfə Rza səliqəli oynadı. Bir qədər sonra “dənizçilər” növbəti əks-hücum şansı qazandılar. Bu dəfə də Alluş ara ötürməsi ilə Pedronu qapıçıyla üz-üzə qoymaq istədi. Ancaq Pedro Höccətlə mübarizədə yerdə qaldı.

İkinci hissədə “Səbail” dominantlıq etməyə çalışdı. Elə ilk hücum da Bayıl təmsilçisindən gəldi. Bu dəfə əks-hücuma çıxan Pedro topu heç kimə ötürməyərək qapını özü yoxlamaq istədi. Yetərincə təhlükəli zərbəni qolkiper topu dəf etdi. Qapıçıdan qayıdan topu Ramalinqom tora qovuşdursa da, yan xətt hakimi ofsayd qərarı verdi. Daha sonra İnqilab Məmmədov VAR hakimləriylə danışıb epizodun ofsayd olduğu qərarını dəyişmədi.
55-ci dəqiqədə “ağ-qaralar” fərqi artırmağa yaxın oldu. Rəhmanın cərimə zərbəsindən qapı qarşısına göndərdiyi ötürməni Şinyaşiki başla qapıya yönəltsə də, Səlahət zərbəni dəf etdi, ardından Matiasın zərbəsi qeyri-dəqiq oldu. Qonaqlar 60-cı dəqiqədə hesab arasındakı fərqi azaltmağa yaxın oldu. Madi komandanın ən sərrast oyunçusu Ramalinqomun nəzarətsiz qaldığını görüb topu ona ötürdü. Lakin Ramalinqomun zərbəsi qapının üstündən keçdi. Sonluq qarşılıqlı hücumlar şəraitində keçdi. 82-ci dəqiqədə Boqomolski qapıçıyla təkbətək vəziyyətdə topu qapının üstündən vurdu. Cəmi 2 dəqiqə sonra Ramalinqom bəlkə də mövsümün qoluna imza atacaqdı. Amma Rza onun qayçıvari zərbəsinin qarşısını aldı. 85-ci dəqiqədə Lebonun ötürməsindən sonra müdafiəçilərin diqqətindən yayınan Boqomolski oyunda son nöqtəni qoydu – 3:0. Beləliklə, oyun “Neftçi”nin parlaq qələbəsiylə yekunlaşdı. Mövsümdə ilk dəfə böyükhesablı qələbəyə sevinən Bojoviçin komandası turnir cədvəlinin 2-ci pilləsinə yüksəldi. Düzdü, “ağ-qaralar” turun sonunda bu mövqeni əldən verə bilər.

Gözdən qaçmadı
* Adil Nağıyev sarı vərəqə aldığına görə hakimə kəskin şəkildə etiraz etdi.
* “Dənizçilər” azarkeş qrupu “Kəpəz”ə vermisən, bizə niyə vermirsən” şüarını səsləndirdi.
* “Forza Neftçi” boykotu davam etdirdiyi üçün tribunadakı yerində yox idi. “Neftçimania” da, sadəcə, qara pankart açmışdı.

KAMAL SƏFƏR