Argentina Liqa Kubokunun (LK) qrup mərhələsində martın son, aprelin ilk günlərində 12-ci turun oyunları keçirildi.

"Football-plus.az" xəbər verir ki, qeydə alınan nəticələrdən sonra A qrupunda üçhakimiyyətlilik pozuldu, B qrupunda isə “Qodoy Krus” liderliyini davam etdirdi. Diqqəti cəlb edən əsas fakt qrup mərhələsinin sonuna iki tur qalmış heç bir komandanın 1/4 finalda yerini təmin edə bilməməsi ilə bağlıdı.
11-ci turdan sonra A qrupunda birdən-birə 3 komandanın şərikli liderliyi formalaşmışdı. Topların daha yaxşı fərqinə əsasən 1-ci yerdə olan “River Pleyt” üçün “Atletiko Urakan” ilə səfər oyunu uğursuz alındı. Ev sahibi statusunda olan komanda qrupun autsayderləri sırasında olsa da, bu mövsüm heç kimin bacarmadığına nail oldu. Topa daha çox nəzarət edən ölkə nəhənginin qapıya yol tapa bilməməsi meydan sahiblərinin arxa xətdə inamlı oyununa görə mümkün oldu. Qrupda heç bir iddiası qalmayan “Atletiko Urakan”ın azarkeşləri sona yaxın “qol” qışqıraraq sevinmək imkanı da qazandılar. Matsantti 78-ci dəqiqədə tribunaları ayağa qaldırdı. Maraqlıdı ki, 27 yaşlı hücumçu qapıya yol tapandan əvvəl və sonra aldığı sarı vərəqələrə görə komandasını meydanda azlıqda qoydu. “River” dərhal böyük qüvvə ilə irəli atılsa da, cavab qolunu belə vura bilmədi. Nəticədə Martin Demiçelisin komandası bu mövsüm ilk məğlubiyyəti ilə barışmalı oldu. Argentina çempionatının son qalibi bu nəticə ilə liderlikdən 4-cü yerə düşdü.

Tura topların fərqinə əsasən 2-ci yerdə başlayan “Arxentinos Xuniors” isə maksimum xal qazandı. “Yeniyetmələr” səfərdə “İnstituto”ya 2:1 hesabı ilə qalib gəldilər. Əzmkar qələbə Pablo Gedenin komandasını 1-ci yerə çıxardı.

Amma “Veles Sarsfild” bu dəfə büdrədi. “Talyeres de Kordoba” ilə səfər oyunundan əvvəl ardıcıl 3 qələbə qazanan paytaxt komandası minimal hesabla məğlub oldu. Uğurlu seriyası qırılan “Veles” 3-cü yerdən 5-ə gerilədi. “Talyeres de Kordoba” isə vacib qələbə ilə 2-ci yerə çıxdı.

Tur “Barrakas Sentral” üçün də uğurlu alındı. Komanda mövsümün əvvəlindən qeyri-sabit oyun sərgiləyən “Rosario Sentral”a səfərdə qalib gələrək 3-cü yerə çıxdı. 1:2 hesablı məğlubiyyət LK-nın son çempionunun pley-offa vəsiqə verən ilk “4-lüy”ə düşmək şansını heçə endirdi.

Bir ara vahid lider olan “İndependyente” son həftələr azarkeşlərini məyus etməkdədi. Karlos Tevesin çalışdırdığı komanda yenə qalib gələ bilmədi. Evdə “Atletiko Tukuman”a məğlubiyyətdən son dəqiqələrdə qurtulan (1:1) “qırmızılar” artıq 4 oyundu qələbə üzü görmürlər. Son 4 oyunda 3 xal qazanan “İndependyente” 6-cı yerdə qaldı. Tevesin komandası hələ ki pley-offa çıxmaq şansını qoruyur.

B qrupunda “Qodoy Krus”un liderliyi davam edir. Daniel Oldranın komandası hesabat turunda “Platense”ni səfərdə 2:1 hesabı ilə üstələdi. Son dəqiqələrdə realaşan bu nəticə mendosalılara mövqeyini qorumaq imkanı yaratdı. İndi onların pley-offa lider kimi adlamaq şansı bir qədər də artıb.
Liderin əsas izləyicisi “Lanus” turu xal itkisi ilə başa vurdu. Evdə “Union”a məğlubiyyətdən son anlarda xilas olan lanuslular 2:2 hesablı “sülh”ə nail oldular. İki xal itkisi onları liderdən 3 xal geri saldı. Amma “Lanus” 2-ci yeri tərk etmədi.

Tura 3-cü yerdə başlayan “Estudiantes” səfərdə “Defensa y Xustisiya”ya uduzaraq (0:1) 7-ci yerə gerilədi. Ehtiyatda bir təxirə salınan oyunu olan “tələbələr” hələ ki pley-offa çıxmaq şansını qoruyurlar. Onlar kimi tura 18 xalla başlayan “Nyuellz Old Boyz” “Sarmyento” üzərində qələbə (1:0)
ilə 4-cü yerdən 3-ə, “Defensa y Xustisiya” isə 4-ə yüksəldi.

Əvvəlki turda “Estudiantes” ilə səfər oyunu 27-ci dəqiqədə dayandırılan “Boka Xuniors” paytaxt derbisindən qalib çıxdı. “San Lorenso” üzərində 2:1 hesablı qələbə ölkə nəhənginin 7-ci yerdən 5-ə yüksəlməsinə şərait yaratdı.

qrup mərhələsi, 12-ci tur
Atletiko Urakan - River Pleyt 1:0
Matsantti, 78.
İnstituto - Arxentinos Xuniors 1:2
F.Suares, 48 – M.Romero, 82. Xose Errera, 90+5.
Talyeres de Kordoba - Veles Sarsfild 1:0
Mammana, 13-öz qapısına.
Rosario Sentral - Barrakas Sentral 1:2
Malkorra, 51 – Kantero, 19. Kapraro, 44.
İndependyente - Atletiko Tukuman 1:1
İsla, 89 – Baxamiç, 34.
Platense - Qodoy Krus 1:2
Pelleqrino, 28 – E.Lopes, 3. Santyaqo, 90+2.
Lanus - Union 2:2
Karrera, 45+1. F.Alvares, 90+3 – Pardo, 11. Balboa, 26.
Defensa y Xustisiya - Estudiantes 1:0
Boqarin, 25.
Sarmyento - Nyuellz Old Boyz 0:1
İ.Ramires, 81-p.
Boka Xuniors - San Lorenso 2:1
Kavani, 42. Merentyel, 84 – Bareyro, 9-p.
Tiqre - Belqrano 1:4
Flores, 40 – Lukko, 36. U.Sançes, 39; 42. Passerrini, 76.
Sentral Kordoba - Rasinq 1:3
Qarrido, 64 – A.Martines, 24; 53; 90+5.
Ximnasiya - Deportivo Riestra 2:1
Morales, 39. E.Ramires, 73 – Xonatan Errera, 64.
İndependyente Rivadaviya - Banfild 1:2
Kastro, 15 – Sepulveda, 36. Kuyros, 40.

A qrupu
1. Arxentinos Xuniors 12 7 3 2 22-11 24
2. Talyeres de Kordoba 12 6 4 2 21-13 22
3. Barrakas Sentral 12 6 4 2 14-10 22
4. River Pleyt 12 5 6 1 21-8 21
5. Veles Sarsfild 12 6 3 3 13-13 21
6. İndependyente 12 5 4 3 11-8 19
7. İnstituto 12 5 2 5 15-11 17
8. Ximnasiya 12 5 1 6 15-18 16
9. Banfild 12 3 5 4 12-13 14
10. Rosario Sentral 12 4 2 6 8-15 14
11. Atletiko Urakan 12 3 3 6 8-12 12
12. Deportivo Riestra 12 3 2 7 7-15 11
13. İndependyente Rivadaviya 12 2 1 9 12-23 7
14. Atletiko Tukuman 12 0 7 5 5-17 7

B qrupu
1. Qodoy Krus 12 8 2 2 15-5 26
2. Lanus 12 7 2 3 19-10 23
3. Nyuellz Old Boyz 12 6 3 3 12-11 21
4. Defensa y Xustisiya 12 5 5 2 14-13 20
5. Boka Xuniors 11 5 4 2 16-10 19
6. Rasinq 12 5 3 4 18-11 18
7. Estudiantes 11 5 3 3 11-8 18
8. Union 12 4 5 3 14-12 17
9. San Lorenso 12 3 6 3 10-12 15
10. Platense 12 2 6 4 6-13 12
11. Belqrano 12 2 5 5 17-16 11
12. Sentral Kordoba 12 2 4 6 10-15 10
13. Sarmyento 12 2 3 7 9-17 9
14. Tiqre 12 1 2 9 6-21 5
Bombardirlər: Borxa (River Pleyt), A.Martines (Rasinq) - 10, İ.Ramires (Nyuellz Old Boyz) - 8.