Dekabrın 10-da keçirilən oyunlarla Argentina Liqa Kubokunun (LK) pley-off mərhələsində yarımfinal oyunları keçirildi. Diqqəti cəlb edən əsas fakt hər iki matçda qalibin penalti seriyası ilə müəyyənləşməsi oldu.

"Football-plus.az" xəbər verir ki, qrup mərhələsində 28 komanda iki qrupda birdövrəli sistemlə mübarizə aparıb. Qruplarda ilk 4 yeri tutanlar kubok uğrunda mübarizəni davam etdirmək hüququ qazanıblar. Qrupu 1-ci və ya 2-ci yerdə başa vurmağın üstünlüklərinin olduğunu da qeyd edək. Belə ki, ilk iki yerin sahibləri 1/4 finalda digər qrupda uyğun olaraq 4-cü və 3-cü yerləri tutan komandalarla qarşılaşmaq hüququna malik idilər. A qrupunda ilk 4 yeri uyğun olaraq “Atletiko Urakan”, “River Pleyt”, “Banfild” və “Rosario Sentral”, B qrupunda isə “Rasinq”, “Qodoy Krus”, “Belqrano” və “Platense” tutmuşdu. Maraqlıdı ki, 1/4 finalda üç matçda qalib penalti seriyasından sonra müəyyənləşmişdi.

Yarımfinalın ilk matçı San Nikolasda keçirildi. “Qodoy Krus” və “Platense” ilk hissədə bir-birinin qapısına bir dəfə yol tapdılar. Əsas vaxt 1:1 hesabı ilə nəticələndi. LK-nın reqlamentinə görə, 30 dəqiqəlik əlavə vaxt nəzərdə tutulmadığı üçün komandalar əsas vaxt bitəndən sonra penalti seriyasında gücünü sınamalı oldular. Bu sınaqdan 6:5 hesabı ilə qalib çıxan “Platense” ilk finalçı oldu.

“River Pleyt” – “Rosario Sentral” matçında isə qapılara qol vurulmadı. “Lotereya” adlandırılan mübarizədə 2:0 hesablı üstünlüyə nail olan “Rosario Sentral” qalib gəldi. Maraqlıdı ki, Argentinanın son çempionu olan “River Pleyt”in 4 oyunçusundan heç biri qapıya yol tapa bilmədi. Üç zərbədən ikisini qola çevirən rəqib finala vəsiqə qazandı. Başqa sözlə, “milyonçular”ın Martin Demiçelisin başçılığı altında ardıcıl ikinci turnirdə qalib gəlmək istəyi baş tutmadı.

Beləliklə, dekabrın 17-nə təyin olunan finalda “Platense” ilə “Rosario Sentral” qarşılaşacaq. LK-nın qalibi Santyaqo del Estero şəhərində müəyyənləşəcək.

yarımfinal
Qodoy Krus - Platense 1:1, p. – 5:6
S.Rodriges, 28 – R.Martines, 18.
River Pleyt - Rosario Sentral 0:0, p. – 0:2
Bombardirlər: Passerini (Belqrano) – 10, Qondou (Arxentinos Xuniors) - 9, Bareyro (San Lorenso), Merentyel (Boka Xuniors) - 7.