Terim yenə Luçesku ilə bacarmadı - onun kiçik qızı boşandı
Türkiyədə olduğu kimi, Yunanıstan çempionatında da gərgin çempionluq mübarizəsi davam edir.
“Football-plus.az” xəbər verir ki, Türkiyədə titul uğrunda iki komanda mübarizə aparırsa, Yunanıstanda bunların sayı 4-dü. Fatih Terimin çalışdırdığı “Panatinaikos” ötən tur səfərdə “Olimpiakos”u məğlub etməklə çempionluq pley-offuna əla start vermişdi. Amma Afina təmsilçisi bu uğurun davamını gətirə bilmədi. Srağagün “ağ-yaşıllar” doğma meydanda PAOK-u qəbul etdi. İş elə gətirib ki, PAOK Terim üçün Yunanıstanda həm ən prnsipial, həm də ən çətin rəqibə çevrilib. Bu komandanı Mirça Luçeskunun oğlu Razvan çalışdırır. “İmperator” yeni klubunun başında çempionatda ilk məğlubiyyətini məhz PAOK–la ev oyununda yaşamışdı. Yanvarın sonlarına təsadüf edən həmin matçdan öncə Mirça Luçesku “Terimi Türkiyədəki derbilərdə məğlub edərək “Beşiktaş”ı çempion etmişdim. İndi də oğlum ona rəqibdi. Razvanın Terimə uduzacağını düşünmürəm” açıqlamasını verməklə diqqəti çəkmişdi. Düzdü, türkiyəli mütəxəssis bu məğlubiyyətin qisasını kubokda almış və yarımfinalda “Panatinaikos” PAOK səddini adlamışdı (səfərdə 1:0, evdə 1:2, p. – 6:5). Amma bazar günü çempionluq pley-offunun 2-ci turunda “Panatinaikos” yenə evdə PAOK-a uduzaraq (2:3) çempionluq yolunda ağır yara aldı. Yenə Mirça Luçeskunun sözləri yada düşdü. “Panatinaikos” Terimin başçılığı altında keçirdiyi 18 rəsmi oyundan 9 qələbə, 5 heç-heçə, 4 məğlubiyyətlə ayrılıb. Bu 4 məğlubiyyətdən 3-ü Razvan Luçeskunun komandası ilə oyunlarda qeydə alınıb. Özü də üçü də evdə! Son uğursuzluqdan sonra 59 xala malik olan “Pana” ilə lider arasında fərq 6 xala yüksəldi. AEK 65 xalla 1-ci, PAOK 63 xalla 2-ci pillədədi. Maraqlidi ki, PAOK-a məğlubiyyətin ardından Terim hakimlikdən gileyləndi. Baxmayaraq ki, oyunu əcnəbi hakim – danimarkalı Mikkel Redder idarə edirdi:
“PAOK-u təbrik edirəm. Bir çox şansımız olsa da, dəyərləndirə bilmədik. Adətən, hakimlik haqda danışmağı xoşlamıram. Amma Yunanıstan çempionatı səviyyəsiz hakimlərə layiq deyil. Belə oyunun sonuna cəmi 4 dəqiqə əlavə edən hakim utanmalıdı. Mən hələ verilməyən qırmızı vərəqədən və qayda pozuntularından danışmıram. Belə hakim göndərməkdənsə, göndərməsələr yaxşıdı. Bura Danimarkanın ən pis hakimini göndəriblər”.
Terimin bu sözləri onsuz da oyundan sonra Yunanıstan mətbuatında ona yönələn tənqidin dərəcəsini bir qədər də artırıb. Bir çox nəşrlərin və idman portallarının fikrincə, düzgün heyət qurmayan və yığmaların düşərgəsindən yorğun qayıdan oyunçulara şans verən “İmperator” səhvi özündə axtarmaq əvəzinə hakimi “qurbanlıq qoyuna” çevirmək istəyib. “Panatinaikos” növbəti oyununu artıq sabah keçirəcək. “Ağ-yaşıllar” evdə son çempion AEK-i qəbul edəcək.
Terimdən söz düşmüşkən, bir xəbəri də diqqətinizə çatdıraq. Ünlü mütəxəssisin kiçik qızı Busə Terim bugünlərdə 10 illik həyat yoldaşı Volkan Bahçekapılıdan boşanıb! Cütlüyün 2016-cı il təvəllüdlü Nil və 2018-ci il təvəllüdlü Naz adlı qızları var. 40 yaşlı iş adamı Volkan Bahçekapılı əslən trabzonlu olsa da, “Fənərbaxça” azarkeşi kimi tanınır. O, Əmrə Belözoğlunun xalası oğludu. Boşanma xəbərlərinin ardından qısa açıqlama verən Busə bunları deyib:
“Uzaqlaşaraq bəzi problemləri yoluna qoya bilməyəcəyimizi anladığımız üçün evliliyimizi bitirmək qərarına gəldik. Bu evliliyin bizə hədiyyəsi iki qızımızdı. Bu çətin dönəmimizdə bizim və xüsusilə də övladlarımızın həyatına hörmətlə yanaşacağınıza ümid edirik”.
Digər xəbərlər
