Fatih Terim Yunanıstanda adından söz etdirməkdədi.

Dekabrın sonlarında sürpriz qərar verərək «Panatinaikos”un başına keçən «İmperator» Yunanıstan nəhənginin 2010-cu ildən bəri davam edən çempionluq həsrətinə son qoymaqda qərarlıdı. Bazar günü həm «Qalatasaray», həm də Terim üçün uğurlu alındı. Məhz bazar günü «Fənərbaxça”nın xal itirməsindən sonra «Qalatasaray» vahid liderliyə yüksəldi. Həmin gün Yunanıstan çempionatının 22-ci turunda «Panatinaikos» da səfərdə «Panserraikos”u 3 cavabsız qolla darmadağın etdi. Bu nəticədən sonra gözlər lider PAOK ilə son çempion AEK-in duelinə yönəldi. «Tumba» stadionunda keçirilən qarşılaşma 1:1-lik bərabərliklə yekunlaşdı. Beləliklə, «Panatinaikos» xalını 50-yə yüksəldərək AEK-i ikinci pillədən sıxışdırdı. Afina təmsilçisi eyni zamanda PAOK ilə xal fərqini 1-ə endirdi. Yanvarın sonlarında ardıcıl iki məğlubiyyətdən sonra Terim Yunanıstanda ilk dəfə tənqid atəşinə tutulmuşdu. Amma komanda həmin uğursuzluqdan dərs çıxararaq son 3 oyunu qələbə ilə başa vurmuş oldu. Zədə üzündən bir sıra əsas oyunçularını itirən Terimin kollektivi yeni transferlərin gəlişindən sonra gücləndi.

«Panatinaikos» türkiyəli mütəxəssislə çempionatda 7 oyundan 5 qələbə, 1 heç-heçə, 1 məğlubiyyətlə ayrılaraq 21 mümkün xaldan 16-nı toplayıb. Bundan başqa, Terim komandasını kubokun yarımfinalına da daşıyıb. Yeri gəlmişkən, artıq sabah «Pana» kubokun ilk oyunu çərçivəsində səfərdə PAOK-a qarşı çox prinsipial bir qarşılaşmaya çıxacaq.

Yunanıstan futboluna aid bir xəbəri də diqqətinizə çatdıraq. Məlum olduğu kimi, «Olimpiakos» 21-ci turda məhz səfərdə «Panatinaikos”a məğlubiyyətdən sonra baş məşçi Karlos Karvalyalla yollarını ayırmışdı. Portuqaliyalı mütəxəssisin klubları Terimin klublarına qarşı keçirdikləri 5 oyunun hamısında qələbəyə həsrət qalıb. Onların yolu daha öncə Türkiyədə də kəsişmişdi. Belə ki, Karvalyal 2011/12-nin gedişində «Beşiktaş”ı çalışdırmışdı. «Olimpiakos» artıq yeni məşqçisini açıqlayıb. Yunanıstan futbolunun ən titullu klubunu bundan sonra Xose Luis Mendilibar çalışdıracaq. Daha öncə «Atletik», «Valyadolid», «Osasuna», «Levante», «Eybar», «Alaves» kimi klubları çalışdıran 62 yaşlı ispaniyalı mütəxəssis sonuncu dəfə «Sevilya”da işləmişdi. O, ötən mövsüm əndəlüslərlə Avropa Liqasının qalibi olmuşdu.