Fatih Terimin çalışdırdığı “Panatinaikos” yenidən qələbələrlə fanatlarını sevindirməyə başlayıb.

"Football-plus.az" xəbər verir ki, Afina təmsilçisi “İmperator”la uğurlu başlanğıcdan sonra ardıcıl 2 rəsmi oyunda uduzmuşdu. Komanda əvvəlcə kubkun 1/4 finalının ilk matçında evdə “Atromitos”a (1:2), 4 gün sonra isə çempionat çərçivəsində səfərdə lider PAOK-a (1:2) boyun əymişdi. Bu iki məğlubiyyətdən sonra məşhur mütəxəssis Yunanıstan mətbuatı tərəfindən ilk dəfə çox ciddi şəkildə tənqid atəşinə tutuldu. Onun komandanı qarşıya qoyulan hədəflərə çatdıra bilməyəcəyi barədə yazılar dərc olundu. “Panatinaikos” fanatları isə sosial şəbəkələrdə əvvəlki baş məşçqi İvan Yovanoviçin şəninə paylaşımlar etdilər. Amma Terim təcrübəsini işə salaraq “ağzıgöyçəkləri” susdurmağı bacardı. “Panatinaikos” əvvəlcə yanvarın 31-də səfərdəki cavab oyununda “Atromitos”u 2:0 məğlub edərək kubokda yarımfinala yüksəldi. Srağagün isə Yunanıstan futbolunun iki barışmaz rəqibi – “Panatinaikos” ilə “Olimpiakos” üz-üzə gəldi. Terimin komandası 2 cavabsız qolla çox mühüm bir qələbə qazandı. Qolları 25-ci dəqiqədə Bernar və 60-cı dəqiqədə Aleksander Yeremeyeff vurdu. 21 turdan sonra hesabında 41 xal olan Karlos Karvalyalın çalışdırdığı “Olimpiakos” çempionluq yolunda çox ciddi zərbə aldı. Xalını 47-yə çatdıran “Panatinaikos” 3-cü pillədə qərarlaşıb. AEK 48 xalla 2-ci, PAOK isə 50 xalla 1-ci pillədədi. Növbəti turda afinalıları səfərdə “Panserraikos”la duel gözləyir. Kubokun yarımfinalında isə çox prinsipial bir rəqib – PAOK var. Oyunlar fevralın 14-ü və 21-də keçiriləcək. Terimin Yunanıstana yollanmasının ardından tanınmış rumıniyalı mütəxəssis Mirça Luçesku “Terimi Türkiyədəki derbilərdə məğlub edərək “Beşiktaş”ı çempion etmişdim. Terim indi də oğlum Razvana rəqib olacaq. Razvanın ona uduzacağını düşünmürəm” açıqlaması ilə diqqəti çəkmişdi. Razvan Luçesku PAOK-u çalışdırır. Bu komandaların yanvarın 28-dəki duelində PAOK üstün olmuş və Luçeskunun proqnozu doğrulmuşdu. Gözləyək görək bu dəfə necə olacaq.