Fatih Terimin çalışdırdığı “Panatinaikos”un nəticələri hələ ki fanatları tam qane etmir.

"Football-plus.az" xəbər verir ki, Afina nəhəngi ötən həftəiçi Yunanıstan kuboku çərçivəsində evdə PAOK-a qarşı dramatik matçda penalti seriyasında möcüzəvi sayıla biləcək bir qələbə qazanaraq adını finala yazdırdı. Amma daxili çempionatda komanda xallar itirməkdə davam edir. Bazar günü Yunanıstan superliqasının 24-cü turunun son oyunu çərçivəsində türkiyəli mütəxəssisin komandası doğma “Apostolos Nikolaidis”də sonuncu pillədə qərarlaşan autsayder “Kifisia”nı qəbul etdi. 2012-ci ildə yaradılan “Kifisia” Afinanı təmsil etdiyi üçün bu oyun derbi sayılırdı. Aşkar favorit statusunda olan “Panatinaikos” Palasiosun qolu ilə fasiləyə öndə yollandı. Meydan sahibləri 2-ci hissənin əvvəllərində də qol vurdu. Amma VAR-ın müdaxiləsindən sonra ofsayd qeydə alındı. Sonrakı dəqiqələr “Panatinaikos” üçün çətin keçdi. 64-cü dəqiqədə mərkəz müdafiəçisi Şenkeveld kobud oyuna görə qırmızı vərəqə alaraq “ağ-yaşıllar”ı azlıqda qoydu. Cəmi 4 dəqiqə sonra qonaqların künc zərbəsi zamanı qurduqları hücumun qarşısını kəsmək istəyən Arao başla topa toxunaraq avtoqol müəllifi oldu. Xatırladaq ki, bu braziliyalı yarımmüdafiəçi “Panatinaikos”a ötən yay “Fənərbaxça”dan transfer olunub. Azlıqda qalan meydan sahibləri qalan vaxtda qalib gəlməkdən çox məğlub olmağa yaxın idi. “Kifisia” bir neçə gözəl fürsəti boşa verdi və oyun 1:1-lik bərabərliklə yekunlaşdı. “Panatinaikos”dan fərqli digər nəhənglər – “Olimpiakos”, PAOK və AEK turu qələbə ilə başa vurdu. Terimin komandası 24 oyuna topladığı 52 xalla 3-cü pillədə qərarlaşıb və lider AEK-dən 3 xal geridədi. “Panatinaikos”un ardıcıl 2-ci ev oyununda qalib gələ bilməməsi “İmperator”a yönələn tənqidləri artırıb. Çünki 23-cü turda Afina nəhəngi öz meydanında “Lamia” ilə də 1:1 bərabərə qalmışdı. Maraqlıdı ki, Yunanıstan mətbuatında Terimin mövsümü “Panatinaikos”un başında tamamlamayacağı barədə şayiələr peyda olub. 70 yaşlı mütəxəssisin Səudiyyə Ərəbistanından təklif aldığı deyilir. Terim oyunsonrası mətbuat konfransında bəxtsizlikdən şikayətləndi və fanatlara pley-offda durumu düzəldəcəklərinə söz verdi. Qeyd edək ki, 14 komandalı Yunanıstan çempionatında normal mövsümün bitməsinə 2 tur qalıb. Daha sonra pley-off oynanılacaq. İlk “6-lıq”dakı klublar çempionluq, son “8-lik”dəki klublar isə elitada qalmaq uğrunda mübarizə aparacaq. “Panatinaikos” indiyə qədər Terimin başçılığı altında 15 rəsmi oyundan 7 qələbə, 5 heç-heçə, 3 məğlubiyyət ilə ayrılıb.