Bazar günü Yunanıstan çempionatının 20-ci turunda Fatih Terimin “Panatinaikos”u lider PAOK-un qonağı oldu. Buna qədər komandaların hesabında eyni – 44 xal var idi.

Afina təmsilçisi liderliyə yüksəlmək fürsətini dəyərləndirə bilmədi. “Panatinaikos” hətta 1 xala da həsrət qalaraq Terimin dönəmində 7-ci rəsmi oyunda ilk məğlubiyyətlə barışmalı oldu (1:2). Meydan sahiblərinin heyətində Kirill Despodovun qoluna “Trabzonspor”dan yeni transfer olunmuş Taros Bakasetas penaltidən vurduğu qolla cavab verdi. Amma bolqarıstanlı Despodovun ikinci qoluna cavab vermək mümkün olmadı. Beləliklə, Mirça Luçeskunun oğlu Razvanın çalışdırdığı PAOK vahid liderliyə yüksəldi. “Panatinaikos” isə hətta turu qələbə ilə tamamlayan və xalını 45-ə yüksəldən son çempion AEK-i də özündən irəli buraxaraq 3-cü pilləyə gerilədi. PAOK-un 43-cü dəqiqəyə təsadüf edən ilk qolundan sonra iki komandanın futbolçuları və məşqçilər korpusu arasında münaqişə yaşandı. Terimlə Luçesku da bir-birinə söz atdı. Münaqişəni yalnız polislərin araya girməsi ilə sakitləşdirmək mümkün oldu.

Terimin köməkçisi Necati Atəş isə sarı vərəqə aldı. “İmperator” matçdan sonrakı mətbuat konfransında zəif oynadıqlarını və qələbəyə layiq olmadıqlarını etiraf etdi. Amma o “heç olmasa, 1 xal qazana bilərdik” ifadəsini də işlətdi. “Panatinaikos”u həftəsonu 21-ci turda əzəli rəqib “Olimpiakos”a qarşı daha bir çətin oyun gözləyir. Sabah isə komanda ölkə kuboku çərçivəsində “Atromitos”un qonağı olacaq.