Fatih Terimin hələ ki, Yunanıstanda işləri pis getmir.

''Panatinaikos'' onun rəhbərliyi altında keçirdiyi hər iki çempionat oyununda qələbə qazanaraq liderliyə yüksəlib. Amma ölkə kuboku çərçivəsindəki son matçda ''Pana'' öz meydanında əzəli rəqibi ''Olimpiakos''la 1:1 bərabərə qaldı.

Bu arada hazırda Türkiyədə olan ''Olimpiakos''un idman direktoru Kristian Karambö Terimlə bağlı diqqətçəkən açıqlamalar verib. Fransanın heyətində DÇ-1998-in qalibi olmuş Karambö dünyanın müxtəlif ölkələrindən idman peşəkarlarının qatıldığı ''Winter League Convention'' adlı tədbirdə iştirak etmək üçün Türkiyəyə gəlib. O, türkiyəli həmkarlarımıza bunları deyib: ''Terim çox böyük markadı. Zatən Yunanıstan futbolunda rəqabət güclü idi. Onun gəlişi ilə birlikdə rəqabət daha da inanılmaz səviyyəyə çatacaq.

Terimin gəlişi üzərimdəki təzyiqi artırmadı. Bu il PAOK və AEK-in də çox yaxşı formada olduğunu nəzərə alsaq, olduqca çətin bir çempionluq mübarizəsi izləyəcəyik. Fikrimcə, Terimin ''Panatinaikos''a təyinatından sonra ''Olimpiakos'' azarkeşlərinin sayı artmağa başlayıb. Bunu sosial şəbəkələrdə də hiss etmək mümkündü. Çünki ''Qalatasaray''ın rəqibləri, yəni ''Beşiktaş''la ''Fənərbaxça'' fanatları məhz bizi dəstəkləməyə başlayıblar''.

ƏLİ