Oyunun hər iki komanda üçün əhəmiyyəti göz önündəydi. “Sumqayıt” ilk “dördlüy”ə qayıtmaq, “Araz-Naxçıvan” uğursuzluq zolağından qurtulmaq üçün meydana çıxmışdı.

İlk hücum cəhdi “kimyaçılar”dan gəlsə də, Abdullanın yerinə düşən müdaxiləsi topun meydandan çıxmasıyla nəticələndi. 5-ci dəqiqədə isə ölkə futbolunun növbəti hakimlik faciəsinə şahidlik etdik. Daha dəqiqi, Kamranbəy Rəhimovla Cavid Cəlilovun birgə fəaliyyəti fiaskoyla nəticələndi. Belə ki, Rezabala Səbuhinin ötürməsindən sonra “çərçivə”ni nişan aldı. Top ekvadorlu yarımmüdafiəçinin qeyri-dəqiq zərbəsindən sonra meydanı tərk etdi. Ardından Rezabala topa müdaxilə etmək məqsədilə irəli atılan Avrama ilişərək yerə yıxıldı. Maraqlıdı ki, həmin təmas zərbədən sonra qeydə alınsa da, “Araz-Naxçıvan”ın qapısına penalti təyin olundu. Təbii ki, qapıçının hansısa qayda pozuntusuna yol vermədiyi aşkar idi. Penaltini yerinə yetirən Ninqa hesabı açdı – 1:0. Növbəti təhlükəli vəziyyəti Araz-Naxçıvan”ın ifasında izlədik. Nunonun uzun ötürməsindən sonra Kuzmanoviç Maşikeyə toxunub önünə düşən topa sahib çıxdı. O, Nqandoya, sonuncu isə Elvisə ötürmə verdi. Lakin konqolu yarımmüdafiəçinin başla qapıya zərbəsi Mehdini aldatmağa bəs etmədi. Qapıçı kritik seyvlə yadda qaldı. “Sumqayıt”ın fərqi ikiyə çatdırmaq istəyinə Avram mane oldu. Moldovalı qolkiper operativ davrandığından Səbuhinin uzaqdan gözlənilməz zərbəsini dəf etdi. Bu ərəfədə hər iki komandanın hücumları sıralansa da, “dişə vurulası” epizod yox idi. Hissənin sonunda meydan sahiblərinin fərqi artırması mümkün idi. Lakin Ninqa Muratanın ötürməsini qapıdan keçirə bimədi. Hər halda, üzərinə gələn topu tutmaq Avram üçün çətin olmadı. Sulimanın qeyri-dəqiq ötürməsindən faydala bilməyən Kadirini də qeyd etmək mümkündü. Qanalı yarımmüdafiəçi topun önünə düşməsindən sonra qapıya zərbə endirmək üçün fürsət tapsa da, Mehdi səhvə yol vermədi. Beləliklə, ilk yarıda “Sumqayıt”ın üstün oyununu izlədik. “Araz-Naxçıvan”ın hakim qərarından sonra süstləşən futbolçuları isə hansısa uğurla yadda qalmadı.

Belə tendensiya 2-ci hissə üçün də keçərli oldu. Oyun canlanandan bir neçə dəqiqə sonra Ninqanın qapıdan yan keçən zərbəsi azarkeşləri həyəcanlandırdı. Montekanın ötürməsini isə Rezabala dəyərləndirə bilmədi. Daha dəqiqi, Avram bu dəfə də keçilməz oldu. Çox keçmədən Ninqanın ötürməsini puç edən Rövlan qeyri-dəqiq ötürməylə yadda qaldı. Muxtar Respublika təmsilçisi isə meydanda yox kimi idi. “Sumqayıt” qələbə sayəsində ilk “dördlüy”ə döndüsə, “Araz-Naxçıvan” “avrokubok zonası”ndan bir qədər də uzaq düşdü.

Gözdən qaçmadı
* Azarkeşlər martın 28-də 26 yaşını tamamlayan Rövlanın doğum gününü şüarlarla təbrik etdi.
* “Sektor 85” hədsiz zəif dəstəklə yadda qaldı. Onlar nominal azarkeş təsiri bağışlayırdı. “Kimyaçılar” isə əvvəldən sona qədər komandanı dəstəklədi.
* Media sektoru internetlə təmin edilməmişdi.
* Samir Abasov cəzalı olduğundan matçı tribunadan izlədi. O, Ninqanın hesabı açdığı epizodda sevinmədi. Əksinə, başını aşağı saldı. Görəsən, niyə?
* “Sumqayıt”ın məşqçisi Seymur Rəhimov hakimin qərarına etiraz etdiyinə görə 90+2-ci dəqiqədə qırmızı vərəqəylə cəzalandırıldı.

KƏNAN BAHADIR