"Qəbələ"nin bir gün əvvəl "Zirə" ilə oyundan qalib ayrılmaması "Kəpəz" üçün üçün əlavə motivasiya mənbəyi olmalıydı. "Araz-Naxçıvan" isə meydana Konfrans Liqasına vəsiqə qazanmaq şansını artırmaq üçün çıxırdı.

Qonaqlar matça daha yaxşı başladı. İlk dəqiqələrədn üstünlüyü ələ almaq istəyən naxçıvanlılar erkən qol vurmaq niyyətindəydi. Lakin öncə Kuzmanoviç yaxşı şansı əldən verdi. Sonra isə Vanderson Miçonun səhvini təkrarladı. Braziliyalı yarımmüdafiəçi qapı istiqamətində zərbə endirsə də, təkbətək mübarizədə Rodrigesi yenə məğlub etmək mümkün olmadı. Belədə "Araz-Naxçıvan"ın ruh düşkünlüyü yaşadığı, hətta matçdan "qopduğu" hiss olunmağa başladı. Çox keçmədən Turalın küncdən zərbəsiylə start götürən hücum cəhdi qolla nəticələndi. Ehtiram qapıçının dəf etdiyi topu sinəsiylə qəbul edib hələ havada ikən "çərçivə"yə göndərdi - 1:0. Bundan sonra qonaqlardan Azzazui fərqlənə bilərdi ki, Rodriges qapısını toxunulmaz saxladı. 28-ci dəqiqədə Turan bir neçə müdafiəçinin arasından sıyrılaraq Orxana ötürmə verdi - 1:1. Burda "Kəpəz"in bir neçə futbolçusu diqqətsizliyin bədəlini ödəməli oldu. Amma qonaqların sevinci uzun çəkmədi. İkinci qol axtrışında olan komandalardan "sarı-göylər" məqsədinə çatdı. Martinsin künc zərbəsindən başlatdığı epizod Ehtiramın başla zərbəsiylə qolla nəticələndi. Bu, birinci hissənin sonuncu qolu və təhlükəli epizodu oldu.

İkinci hissədə isə "Kəpəz"in hücumların sayını artırması, "Araz-Naxçıvan"ın heyətindəki dəyişikliklər matçı canlandırdı. İlk hissədə Vandersonla Miçonun əldən verdiyi fürsətlər bu dəfə Nianenin əlinə düşdü ki, gəncəlilərin üzvü də eyni xətalara yol verdi. O, gah qeyri-dəqiq zərbə endirdi, gah da qapıçını keçə bilmədi. Hər halda, Avramın da bu epizodlarda tər tökdüyünə şübhə yoxdu. Bu ərəfədə "Kəpəz"in növbəti hücumu, daha dəqiq desək, Adil Şükürovun dəyişikliyi bəhrə verdi. Nianenin yerinə meydana çıxan Amil komandasının üçüncü qolunu vurdu. O, 69-cu dəqiqədə Fallın ötürməsini rahatlıqla qəbul edib topu "çərçivə"yə göndərdi. Yunanov 5 dəqiqə sonra yenidən qol vura bilərdi. Lakin Amil Martinsə ötürmə verdi ki, o da qeyri-dəqiq zərbəylə yadda qaldı. "Araz-Naxçıvan"ın tutarlı yeganə hücum cəhdini uzatma dəqiqələrində izlədik. Lakin Maşike Elçinin ötürməsini qola çevirə bilmədi. Qəbələdə rəqib tanımayan "Kəpəz" "Qəbələ"ni artıq 5 xal qabaqlayır.

KƏNAN BAHADIR