Bu matç hər iki tərəf üçün eyni dərəcədə vacib idi.

“Kəpəz” və “Araz-Naxçıvan” 4 turun nəticələrinə görə uyğun olaraq, 8-9-cu pillələrdə qərarlaşmışdı. Qalibi millinin oyunlarıyla bağlı fasiləyə rahat yollanmaqla yanaşı, “Sabah”ı da qabaqlayacaqdı. Ötən tur “Araz-Naxçıvan” “Sumqayıt”la (1:1), “Kəpəz” “Qarabağ”la (1:1) heç heçə etdiyindən komandaların psixoloji durumu yaxşı idi. Gəncə təmsilçisi bu cəhətdən daha üstün görünürdü. Amma proqnozlar növbəti dəfə reallıqla üst-üstə düşmədi. “Sarı-göylər” “qırmızı-ağlar”ın təzyiqinə təxminən yarım saat tab gətirdi. Düzdü, Azər Məmmədovun yetirmələri oyuna fəal başlamışdı. Avramın qoruduğu “çərçivə”yə ardıcıl zərbələr gəlirdi. Şuaybu və Əlicanov bəxtini sınasa da, qolkiperin müdaxiləsi uğurlu alındı. Bundan sonra qonaqlar hegemonluğu ələ aldı. Kuzmanoviç qola çox yaxınlaşmışdı ki, Vasilyuçek qayda pozuntusuyla onu dayandırdı. 40-cı dəqiqədəki epizod hakimin penalti təyin etməsiylə nəticələndi. Məsuliyyət ötən mövsümün bombardiri Orxanın üzərinə düşdü. O, penaltini dəqiq yerinə yetirdi. Qolkiper önə atılsa da, top ona toxunaraq tora qovuşdu. Bundan sonra ev sahiblərinin daha yaxşı çıxış edəcəyi gözlənilirdi. Lakin azarkeşlərin möhtəşəm dəstəyi belə işə yaramadı. Gəncəlilərin “ölü” oyunu ikinci qolu labüd etdi. Rodriges “Kəpəz”in sağ cinahındakı boşluqdan faydalanıb xeyli irəlilədi. Vinger həmin epizoddakı çıxışını Orxana ötürməsiylə bitirdi. İlk qolun müəllifi isə bu dəfə də fərqləndi - 45-ci dəqiqədə gözəl baş zərbəsiylə Vasilyuçeki növbəti dəfə məyus etdi.

İkinci yarı da “Araz-Naxçıvan”ın təzyiqiylə başladı. Qonaqlar ardıcıl qol vəziyyətləri yaradırdı. Hücum cəhdlərindən birində Tural kəsərsiz zərbə vurdusa, digərində Vasilyuçek Orxanın “çərçivə”yə göndərdiyi topu tutdu. Hər halda, “Kəpəz” təsəlli qolunu vura bildi. Turan Manafov Elnur Cəfərovu qayda pozuntusu hesabına dayandırdı. Kvirkviya da penaltini boşa vermədi. Qoldan sonra “sarı-göylər”in daha inamlı çıxışını izlədik. Azər Məmmədovun komandası sona yaxın hücumları intensivləşdirdi. Şuaybunun zərbəsi kəsərsiz alındısa, Elnur boş qapını dəqiq nişan ala bilmədi. Məhz bu epizoddan sonra ədalət təmsilçisinin final fiti “Kəpəz”in məğlubiyyətini rəsmiləşdirdi.

Gözdən qaçmadı
*“Kəpəz” azarkeşləri 13-cü dəqiqədə mərhum futbolçu Şəhriyar Əliyevi yad etdi. Onlar “Ən böyük kapitan bizim kapitan” şüarını səsləndirdi.
* AFFA İcraiyyə Komitəsinin üzvü, Futzal Federasiyasının prezidenti Zaur Axundov matçı stadiondan izləməyə gəlmişdi. Gəncəli yaşlı azarkeşlər ona “Misli”ni ölkəyə kim gətirib? Xahiş edirik, Azərbaycan futbolunu qoruyun, məhv olmasına icazə verməyin” sözlərini dedilər. Axundov isə futbolun qorunduğunu, inkişafa doğru addımların atıldığını və hər şeyin daha yaxşı olacağını bildirdi.
*“Kəpəz” azarkeşləri matçboyu baş hakim Kamran Əliyevi təhqir etdi. Oyundan sonra polislərlə birlikdə meydançanı tərk edən ədalət təmsilçisi tərəfdarların ciddi qınaq uğultusuyla yola salındı.

KƏNAN BAHADIR