Komandaların məsuliyyəti böyük idi.

“Turan Tovuz” autsayderlər sırasından uzaqlaşmalı, “Araz-Naxçıvan” ilk “dördlük”dəki yerini qorumalıydı. Oyun bayram ab-havasında başladı. Meydan sahibləri dərhal rəqib üzərində ciddi təzyiq yaratdı. Artıq 4-cü dəqiqədə hesab açıldı. Hakman topu uzaqdan qapı önünə göndərdi. Burda fürsət gözləyən Otto bəxtini sınasa da, Avramı keçə bilmədi. Qapıçının kənarlaşdırmaq istədiyi top Xəyala qismət oldu ki, futbolçu boş qapını dəqiq nişan aldı. Hakimlər həmin anda oyundankənar vəziyyət olmasından şübhələnsə də, VAR qolu qeydə aldı. Oyun davam etdikcə “Araz-Naxçıvan”ın istəkli olsa da, faydasız, “Turan Tovuz”un üstün çıxışını izlədik. Qonaqlardan Vadim qol vurmağa yaxın idi ki, Kamal irəli atılıb topu sahibləndi. Meydan sahiblərindən isə Veysəllə Fəridin “çərçivə”yə düşməyən zərbələri oldu. “Bozqurd”un ikinci qoluna Qonçalves imza atdı. Braziliyalı futbolçu Xəyalın küncdən zərbəsindən göndərdiyi topu başla tora qovuşdurdu. Düzdü, birinci hissədə tərəflərin qarşılıqlı hücumları gördük. Lakin qonaqların təhlükəli epizod müəllifi olduğunu deyə bilmərik.

İkinci yarının əvvəli birini hissənin davamı idi. Fəridin fərqi üçə çatdırmaq istəyinin qarşısını Avram aldı. Azzazuinin yumşaq zərbəsindən qorunmaq isə Kamal üçün çətin olmadı.Turanın 55-ci dəqiqədə yerinə yetirdiyi cərimə zərbəsindən sonra oyun dayandı. Çünki Sərtan qapı önündə əllə oynamışdı. Rəvan Həmzəzadə epizodu VAR-da yoxladıqdan sonra penalti təyin etdi ki, nəticədə Azzazui Kamalı məyus etdi – 2:1. 60-cı dəqiqədən sonra güclü külək başladığından oyunun tempində dəyişiklik oldu. Ötürmələr dəqiq olmur, hücum cəhdləri fayda vermirdi. Bu ərəfədə ev sahiblərindən Otto, Hakman və Xəyalın, qonaqlardan Azzazui, Orxan və Vandersonun zərbəli qapıdan aralı keçdi. 81-ci dəqiqədə baş verən məlum hadisədən sonra matç dayandı. Dekabrın 24-də görüşün davamını izlədik. Yenə “Turan Tovuz”un üstün çıxışı göz önündəydi. Belədə növbəti qol da ev sahiblərinin hesabına yazıldı. Xəyal bir neçə rəqibi aldadaraq topu Pusiyə çatdırdı. Albaniyalı hücumçu rəqibin gözündən yayınan Ayxana ötürmə etdi. Rusiyalı yarımmüdafiəçi 90-cı dəqiqədə “çərçivə”ni dəqiq nişan alaraq oyunun yekun nəticəsini müəyyənləşdirdi – 3:1.

Gözdən qaçmadı
* Xəyal komandasının ilk qolunu Ayxan Abbasovu qucaqlayaraq qeyd etdi.
* “Turan Tovuz” azarkeşləri “Hakimdən ədalət istəyirik” şüarıyla etirazını bildirdi.
* Budaq Nəsirov 4 il sonra Azərbaycan çempionatında debüt etdi.

KƏNAN BAHADIR