Bu komandaların cari mövsümdəki duelləri ilə bağlı maraqlı tendensiya var idi. Üç oyunun hər birində 1:0 hesabı qeydə alınmış, bunların ikisində “Zirə”, birində “Sabah” qalib gəlmişdi. Tendensiya pozulmadı!

Rəqibləri birləşdirən daha bir cəhət ikisinin də 2-ci yer uğrunda mübarizə aparması idi. “Sabah” Renduliçin rəhbərliyi altında keçirdiyi oyunların ikisində də qalib gəlmişdi. İlk dəqiqələr meydan sahiblərinin üstünlüyü şəraitində keçdi. Bu ərəfədə Parris uzaqdan zərbə vursa da, top qapıdan aralı keçdi. Çox keçmədən Qismət Alıyevın zərbəsi toru yandan silkələdi. Amma “Zirə”nin kapitanı gec-tez sözünü dedi. 24-cü dəqiqədə məhz onun kornerdən qapı qarşısına ötürməsini Renato qola çevirdi - 0:1. Hissənin sonuna qədər başqa təhlükəli vəziyyət olmadı.

İkinci hissə qonaqların kəskin təzyiqiylə başladı və ilk yarı ilə müqayisədə daha canlı keçdi. “Sabah”ın müdafiə xəttində yaranan anlaşmazlıqdan Suma yararlanmaq istəsə də, Mehbaliyev bu dəfə təslim olmadı. Bir qədər sonra masazırlılar fərqlənməyə yaxın oldu. Sekidikanın zərbəsindən sonra qolkiper gözəl seyvlə zərbənin qola imkan vermədi. 84-cü dəqiqədə Seydiyevin cərimə meydançasına doğru ötürməsi zamanı Sekidika başla zərbə endirsə də, top qapıdan yan keçdi. Son dəqiqələrdə meydan sahibləri hesabı bərabərləşdirməy yaxın oldu. “Zirə”nin müdafiə xəttində yaranan səhvdən Tellur yararlanmaq istəsə də, zərbəsi qapıdan azca aralı keçdi. “Sabah” heç cür məğlubiyyətdən yaxa qurtara bilmədi. Beləliklə, “Zirə” minimal hesablı qələbə sayəsində turnir cədvəlində 3-cü pilləyə yüksəldi, “Sabah” isə Renduliçlə ilk dəfə uduzdu.

Gözdən qaçmadı
* Könüllülər stadiondakı azarkeşlərin iftar açması üçün su paylayırdı.
* Çantakiasa sarı vərəqə göstəriləndə “Sabah”ın azarkeşləri hakimi alqışladı.

ƏSƏD SEYİDOV