Ölkə çempionatında 24-cü tura yekun vuruldu.

İkinci oyun gününün son qarşılaşmasında “Səbail” “Sabah”la üz-üzə gəldi. Turnir cədvəlinin qonşu pillələrində qərarlaşan rəqiblərin hesabında bərabər – 31 xal var idi. Oyunu qalib bitirən tərəf digərini geridə qoyacaqdı.

Oyuna maraq o qədər də böyük deyildi. Hər halda, həm “Dənizçilər”, həm də “Soldati di Sabah” tribunada yerini almışdı.

Oyun qarşılıqlı hücumlarla başladı. Tərəflər ilk dəqiqələrdən hücuma atıldı. 5-ci dəqiqədə Sekidikanın zərbəsi təhlükəli alındı. O, iki rəqibini geridə qoyub, zərbə endirsə də, dəqiq ola bilmədi. Çox keçmədən nigerliyalı yenidən səhnəyə çıxdı. O, Xəyal Əliyevin ötürməsindən sonra qapıçıyla üzbəüz qaldı. Forvard 3 metrdən topu qapıçının üzərinə vurdu. Meydan sahiblərinin ilk təhlükəli hücumu isə 20-ci dəqiqədə yaşandı. Rüfət Abdullazadə bir neçə rəqibini geridə qoyaraq, cərimə meydançasına daxil oldu və Rəhman Daşdəmirovla mübarizədə yerdə qaldı. Referi Rəşad Əhmədov əvvəlcə penalti qərarı versə də, VAR-ın müdaxiləsi ilə sərbəst zərbə təyin etdi. “Dənizçilər” 38-ci dəqiqədə daha bir qol imkanından yararlana bilmədi. Pedro Nunonun qüvvətli alınmayan zərbəsi qapıçıda qaldı. Qonaqların buna cavabı da erkən gəldi. Uzaqdan zərbələri ilə seçilən Da Silva cərimə meydançası həndəvərindən qapını yoxladı. Lakin Səlahət Ağayev inamlı oynadı. 41-ci dəqiqədə Alluşun ötürməsini Ramalinqom zərbə ilə tamamladı. Onun qüvvətli zərbəsini Yusif İmanov dəf etdi. Birinci hissədə son hücum isə “Sabah”dan gəldi. Xəyal Əliyevin uzaqdan zərbəsi dəqiq olmadı.

İkinci yarı da qarşılıqlı hücumlarla başladı. 52-ci dəqiqədə, nəhayət, hesab açıldı. Rüfət Abdullazadənin cinah asmasını Ramalinqom başla tamamladı – 1:0. Qoldan sonra hücumlarının sayını artıran “bayquşlar” irəli atıldı. Bunlardan birində Parrisin iti bucaq altından zərbəsi qapının üstündən keçdi. Qonaqların matçda ən real qol vəziyyəti isə 65-ci dəqiqədə baş verdi. Xəyalın ötürməsini Parris qüvvətli zərbə ilə qapının küncünə göndərdi. Lakin Ağayev çətinliklə də olsa, topu çıxarmağa müvəffəq oldu. Əvəzində rəqib müdafiəsində yaranan boşluqlardan faydalanan meydan sahibləri Pedro Nuno ilə hücuma çıxdı. Onun cərimə meydançası kənarından zərbəsi “çərçivə”yə düşmədi. 72-ci dəqiqədə “Sabah” müdafiəsində yaranan qarışıqlıqda Valdemar Almeyda topu qazandı. O, qolkiperlə üz-üzə çıxsa da, dueldən məğlub ayrıldı. Oyunun sonluğu dramatik alındı. Uzatma dəqiqələrində Da Silvanın cərimə zərbəsindən vurduğu top dəqiq olmadı. Dərhal irəli atılan “Səbail” Səbuhi ilə rəqibini nokauta saldı – 2:0. Bununla da, xalını 34-ə çatdıran “Səbail” “Sabah”la xal fərqini 3-ə çatdırdı.

Gözdən qaçmadı
* Oyunu izləyənlər arasında yığmanın məşqçisi Arif Əsədov da var idi.
* Oyun Xocalı soyqırımının anım günü ilə bağlı birdəqiqəlik sükutla başladı.
* “Səbail”in penalti epizodunda “Sabah”ın məşqçisi İqor Ponomaryov kəskin şəkildə etiraz etdi.

İSMAYIL XEYRULLAYEV