Turun mərkəzi oyunu “Neftçi Arena”da keçirildi.

2-ci yer uğrunda amansız mübarizə aparan “Neftçi” ilə “Zirə” üz-üzə gəldi. Belə önəmli qarşılaşmaya azarkeş marağı, təəssüf ki, hədsiz aşağı səviyyədə idi, tribunaların heç 10 faizi dolmamışdı.

Oyun “Zirə”nin üstünlüyü ilə başladı. İlk təhlükəli hücum da elə məhz qonaqlardan gəldi. Öncə Akanın akrobatik zərbəsi qapı dirəyindən döndü. Ardından Utziqin fərqlənməsinə Cəfərov mane oldu. Hücumun davamında Muradovun qüvvətli zərbəsini Rza dəf etdi. 9-cu dəqiqədə İsayev cərimə meydançası kənarından qapını yoxladı. Lakin qolkiper inamlı oynadı. “Neftçi” isə ilk hücumda hesabı açmağı bacardı. Ozobiç baxımlı ötürmə ilə Koffini qapıçıyla üz-üzə qoydu. Ervin isə bu şansı əldən vermədi – 1:0. Qola baxmayaraq, ilk hissənin sonlarında da diqtə edən tərəf “Zirə” idi. Qonaqlar hissənin sonlarında hesabı bərabərləşdirməyə də nail oldu. Lakin Ceyhun Nuriyevin qapıdan keçirdiyi top VAR tərəfindən qayda pozuntusuna görə qeydə alınmadı. Əvəzində meydan sahibləri Ozobiçlə fərqi artırmağa yaxın olsa da, onun zərbəsində dəqiqlik çatmadı.

İkinci hissə qarşılıqlı hücumlarla başladı. 54-cü dəqiqədə Alıyevin uzaq məsafədən zərbəsi qapıdan aralı keçdi. Çox keçmədən “Zirə” daha bir qol vurmağı bacardı. Lakin Akanın qapıdan keçirdiyi top da qeydə alınmadı. Buna səbəb qoldan öncə topun meydanı tərk etməsi oldu. Meydan sahiblərinin ikinci yarıda ilk təhlükəli hücumu 69-cu dəqiqədə yaşandı. Morenonun uzaqdan qüvvətli zərbəsini Silva küncə çıxardı. 71-ci dəqiqədə Lebon müdafiədəki qarışıqlıqdan yararlanıb, topu ələ keçirdi. Lakin o, qolkiperi də geridə qoyandan sonra, təxminən 3-4 metrdən boş qapıya “düşə” bilmədi. Oyunun sonluğu dramatik alındı. 84-cü dəqiqədə Kontenin ilk zərbəsinin qarşısını qolkiper kəsdi. Forvardın ikinci cəhdində isə ona müdafiəçilər mane oldu. Tərəflərin səylərinə baxmayaraq, matçda hesab dəyişmədi – 1:0. Bu qələbə ilə xalını 35-ə çatdıran “Neftçi” “Zirə”ni 3 xal qabaqlayaraq turnir cədvəlinin 3-cü pilləsində qərarlaşıb.

Gözdən qaçmadı
* “Qartallar” tribunasında böyük ölçülü “Zirə” bayrağı asılmışdı.
* “Neftçimania” matçın gedişində “gözləsin bizi, gəlirik Lənkəran!”, – deyə “Xəzər Lənkəran”ı səsləyirdi.

İSMAYIL XEYRULLAYEV