Turun diqqətçəkən matçlarından biri də “Bəhramov”da keçirildi.

Mövsümə möhtəşəm başlayan, lakin son turlarda zəif çıxış edən “Zirə” 3 oyundu məğlub olmayan “Kəpəz”i qəbul etdi. Matça maraq yox dərəcəsində idi. Çünki tribunalarda yalnız iki sektorda azarkeşlərə rast gəlmək olardı. Onlar da komandaların sabiq azarkeş qrupları – “Qartallar” və “Xəmsə” idi. Hər iki fanklub sona qədər sevimli klubuna dəstək verdi.

Oyun “qartallar”ın üstünlüyü şəraitində başladı. 3-cü dəqiqədə meydan sahibləri qola yaxın oldu. Sumanın baxımlı zərbəsini Rodriges küncə çıxardı. 17 dəqiqə sonra “Zirə” hesabı açdı. Lakin Çantakias oyundankənar vəziyyətdə olduğundan qol qeydə alınmadı. Çox keçmədən yenidən səhnəyə Suma çıxdı. Onun cərimə meydançası kənarından endirdiyi zərbəni yenə Rodriges dəf etdi. Ardından Rəhim Sadıxovun zərbəsində Rüfət Əhmədov topu boş qapıdan çıxardı. Hissənin sonları da meydan sahiblərinin hücumları ilə əlamətdar oldu. Sumanın düşünülmüş ötürməsində Cibrila qapıçı ilə üz-üzə qaldı. Lakin o, zərbə endirmək əvəzinə Sadıxova ötürmə verdi. Rəhimlə Rodrigesin duelindən isə qolkiper qalib ayrıldı. Sadıxov fasiləyə qədər daha bir dəfə ön plana çıxdı. O, Qismət Alıyevin ötürməsini akrobatik zərbə ilə tamamladı. Lakin dəqiq ola bilmədi.

İkinci yarı da eyni ssenari ilə başladı. 50-ci dəqiqədə Sumanın qüvvətli zərbəsini qapıçı dəf etdi. Bir neçə dəqiqə sonra künc zərbəsindən gələn ötürməni Ruan Renato başla tamamlasa da, dəqiq ola bilmədi. Təxminən 2 dəqiqə sonra rəqib müdafiəsində yaranan boşluqdan faydalanan Ceyhun Nuriyev qapını yoxladı. Onun zərbəsi qeyri-dəqiq alındı. “Kəpəz”in buna cavabı gecikmədi. Kvirkviya fərdi reydini zərbə ilə tamamlasa da, top qapıdan yan keçdi. Bunun davamında oyuna tez başlayan “Zirə” hesabı açmağa nail oldu. Sadıxovun ötürməsini Suma dəqiq zərbə ilə tamamladı. Qoldan sonra irəli atılan gəncəlilər Juniorla hesabı dəyişməyə yaxın oldu. Onun uzaq məsafədən endirdiyi zərbə dəqiq olmadı. Az sonra Şakir Seyidov qapını yoxladı. Lakin o da “çərçivə”yə düşə bilmədi. Əvəzində “qartallar” 11 metrlik cərimə zərbəsi qazandı. Onanuqa Eldar Quliyevin qarşısını kobudluqla aldı. Baş hakim öncə cərimə zərbəsi qərarı versə də, VAR-ın köməyi ilə “nöqtə”ni göstərdi. Topun arxasına keçən Alıyev dəqiq oldu. “Kəpəz” isə yalnız vurulan qollardan birinin əvəzini çıxa bildi. Ehtiram Şahverdiyevin asmasını Junior qolla tamamladı – 1:2. Bununla da xal sayını 39-a çatdıran “Zirə” avrokuboklara vəsiqə uğrunda mübarizəni davam etdirir.

Gözdən qaçmadı
* “Zirə” azarkeşləri arasında “Qarabağ” fanatlarına da rast gəlmək olurdu.
* “Kəpəz”in baş məşqçisi Adil Şükürov oyun ərzində hakimlərə kəskin şəkildə etirazını bildirirdi.
* Komandalarının hesabda geridə olmasına baxmayaraq, “Xəmsə” sona qədər “Kəpəz”ə dəstək verdi.

İSMAYIL XEYRULLAYEV