Tovuzda sözün bütün mənalarında futbol ab-havası var idi.

Azarkeşlərin əksəri bir saat öncədən stadiona gəlmişdi və səbirsizliklə hakimin start fitini gözləyirdi. Çünki “Turan Tovuz” Azərbaycanın avrokubok qürurunu, Leverkuzenin səfərinin yorğunluğunu üzərində atmayan “Qarabağ”ı məğlub etməyə çalışacaqdı. Qonaqlar isə çempionluğu erkən təmin etmək məqsədinə doğru daha bir addım atmaq istəyirdi.

Oyun başlar-başlamaz azarkeşlərin möhtəşəm dəstəyi altında irəli atılan “boqzurdlar” rəqibi təzyiq altına saldı. 8-ci dəqiqədə Xəyal topu əlverişli mövqedə olan Souzaya ötürdü. Maksimin kobud müdaxiləsi braziliyalı hücumçunun yerdə qalmasıyla nəticələndi. Hakim cərimə meydançası daxilində yaşananlara biganə qalmayıb “nöqtə”ni göstərdi. Beləliklə, Ottonun 9-cu dəqiqədə yerinə yetirdiyi penalti zərbəsiylə hesab açıldı. Lukanın bu anda, demək olar ki, reaksiya verməməsi diqqətdən yayınmadı. Növbəti təhlükəli vəziyyəti də meydan sahibləri yaratdı. Lakin Şəhriyarın Otto istiqamətində uzun ötürməsi Lukanın cəldliyi sayəsində fayda vermədi. Nigeriyalı hücumçu sürətdə Silvanı qabaqlasa da, önə çıxan qolkiper topa yiyələndi. “Qarabağ”ın ilk tutarlı hücum cəhdini 30-cu dəqiqədə izlədik. Nəriman qapıçıyla təkbətək mübarizədən qalib ayrılıb qol vursa da, laysmanın bayrağı havada idi. Ümumiyyətlə, ilk yarıda meydan sahibləri hücumların kəsəri, baxımlı oyun planında qonaqları üstələdi. Buna baxmayaraq, qeyri-dəqiqlik, bəzən də tələskənlik oyunun axarına mənfi təsir göstərdi. Yəni vacib epizodlar qolsuz başa çatdı. Qonaqlar isə oyuna uyğunlaşmaqda çətinlik çəkir, qayda pozuntularına yol verir və təkbətək mübarizələrdən məğlub ayrılırdı. İkinci yarıda rollar dəyişdi!

Oyun “Qarabağ”ın hesabı bərabərləşdirmək cəhdləriylə davam etdi. Əvvəl Toral uzaqdan zərbəylə bəxtini sınasa da, Aydın əla seyvlə komandasını qoldan xilas etdi. Ardından Toralın qapı önünə ötürməsini Diakabi dəyələndirə bilmədi. Top fransalı yarımmüdafiəçinin tələsik zərbəsiylə qapının üzərindən keçdi. Ağdamlılar ardıcıl üçüncü hücum cəhdində istəyinə çatdı. Almeyda Maksimin ötürdüyü topu Nərimana çatdırdı. Sonuncu başla “çərçivə”ni dəqiq nişan aldı - 1:1. Çox keçmədən Toral əlinə düşən ikinci fürsətdən yararlana bilmədi. Keytanın ötürməsindən sonra qapını nişan alan futbolçu qeyri-dəqiq oynadı. Meydan sahiblərinin 2-ci hissədəki ilk təhlükəli vəziyyətini müəllifi isə Otto oldu. O, təkbaşına özünü rəqibin qapısı önünə çatdırsa da, Luka topu tora qovuşdurmasına imkan vermədi. 69-cu dəqiqədə Qurban Qurbanov ikinci qolu vurmaqda çətinlik çəkən komandasına “yeni qan” qazandırmaq üçün Zubir, Juninyo və Leandro Andradeni meydana buraxdı. Baş məşqçinin əvəzetmələri çox keçmədən bəhrə verdi. Əvvəl Aydın cəldliyi hesabına daha bir seyvə imza atdı. O, Toralın ötürdüyü topu “çərçivə”yə göndərmək istəyən Patrikin qarşısını aldı. Qonaqların ikinci cəhdi qolla nəticələndi. Aleksey künc zərbəsini qısa ötürməylə yerinə yetirdi. Topa yiyələnən Zubir rəqibin qapısı önünə qədər irəliləyib Andradeyə ötürmə verdi. Portuqaliyalı yarımmüdafiəçi isə məsuliyyəti Patrikə buraxdı. Sonuncunun qüvvətli zərbəsiylə 73-cü dəqiqədə “köhlən atlar”ın ikinci qolu reallaşdı. 88-ci dəqiqədə Pusinin zərbəsi Toralın müdaxiləsindən sonra tirdən qayıtdı. Ardından Leandro Juninyonun düşünülmüş ötürməsini dəyərləndirə bilmədi. Oyunda son nöqtəni 90+5-ci dəqiqədə Juninyoya qarşı kobudluğa görə təyin olunan mübahisəli penaltini qola çevirən Toral qoydu. Beləliklə, “Turan Tovuz”un evdəki 7 oyunluq məğlubiyyətsizlik seriyası qırıldı. “Qarabağ” isə növbəti qələbə ilə ən yaxın izləyicisilərindən 26 xal aralandı. Ağdamlılar artıq gələn tur, yəni martın 29-da keçiriləcək “Kəpəz”lə oyunda tarixindəki 11-ci çempionluğu bayram edə bilər.

Gözdən qaçmadı
* Azarkeşlərdən biri matçı stadiona yaxın ərazidə yerləşən evin damından izlədi.
* Aydın Bayramov 72-ci dəqiqədə yaranan təhlükəli vəziyyətə görə komanda yoldaşlarına kəskin şəkildə etiraz etdi.
* Tovuzlu azarkeşlər mübahisəli penaltiyə görə Tural Qurbanovu təhqir etdi.

KƏNAN BAHADIR