Turnir cədvəlində qonşu pillələrdə qərarlaşan rəqiblər Tovuzda qarşı-qarşıya gəldi.

Komandalar “Neftçi” və “Səbail”in xal itirdiyi turda qələbə qazanmaqla “avrokubok zonası”na yaxınlaşmağı planlaşdırırdı. Tovuzda keçirilən əksər oyunlarda olduğu kimi, bu matça da maraq yüksək idi. Meydan sahiblərinə aid sektorların yarısı dolmuşdu. Həm də bilet satışı ilə! Qərblilər 2 və 5 manatlıq biletlərin böyük hissəsini satıb, bitirmişdi. Hətta oyundan öncə stadionun həyətində azarkeşlər arasında lotoreya da keçirildi. Oyunboyu yalnız “Turan Ultras” yox, bütün tribunalar birağızdan komandanı irəli səsləyirdi.

İlk təhlükəli hücum qonaqlar gəldi. Orxan Əliyev 11-ci dəqiqədə qapıçı ilə üz-üzə qalsa da, zərbəsi dirəkdən döndü. Lakin yan xətt hakimi həmin epizodda ofsayd qeydə aldı. 34-cü dəqiqədə Nuno Rodriges cərimə meydançasında yerdə qalsa da, Rəşad Əhmədovun fiti “susdu”. Çox keçmədən naxçıvanlılar daha bir dəfə qola yaxın oldu. Turan Manafovun cinah ötürməsini Nicat Süleymanov tamamlasa da, top qapıçıda qaldı. Meydan sahiblərinin buna cavabı gecikmədi. Fərid Nəbiyevin uzaq məsafədən zərbəsi qapı tirinə toxunub, meydanı tərk etdi.

İkinci yarı da eyni ssenari ilə başladı. Komandalar əsasən meydanın mərkəzində top uğrunda mübarizə apardı. Təhlükəli hücumlar və epizodlar baxımından kasad olan 2-ci hissədə tovuzlular üstünlüyə yiyələndi. 77-ci dəqiqədə Aleks Souza fərdi reydini zərbə ilə tamamlasa da, dəqiq ola bilmədi. Lakin o, 1 dəqiqə sonra adını tabloya yazdırdı. Rəqib mərkəzdən yeni başlamışdı ki, Otto Con topu alıb cərimə meydançasına şığıdı. Onun ötürməsində Souza dublunu rəsmiləşdirdi – 2:0. Sonda hücumların sayını artıran qonaqlar Kurdiçlə qola yaxın oldu. Onun akrobatik zərbəsi dəqiq olmadı.

Beləliklə, “Araz-Naxçıvan”ı məğlub edən “Turan Tovuz” “Zirə” ilə xal fərqini 1-ə endirdi.

Gözdən qaçmadı
* Bilet alan şəxslər oyunöncəsi lotereya iştirak şansı qazandı. Qaliblər matçdan sonra diktor vasitəsilə açıqlandı.
* “Sektor 85” Tovuz səfərində yox idi.
* İlk 50 dəqiqədə künc zərbəsi qeyd alınmadı.

İSMAYIL XEYRULLAYEV