Məlum olduğu kimi bu həftəiçi dünya futbolunda yeni rekord qeydə alındı.

Səudiyyə Ərəbistanı təmsilçisi ''Əl-Hilal'' Asiya Çempionlar Liqasının 1/4 finalının cavab oyununda bu ölkənin digər təmsilçisi ''Əl-İttihad''ı səfərdə 2 cavabsız qolla məğlub etdi. Bu, Jorje Jezuşun komandasının rəsmi oyunlardakı ardıcıl 28-ci qələbəsi oldu.

Avropa mediası iddia etdi ki, bu göstərici ilə ''Əl-Hilal'' futbol tarixində bir ilkə imza atdı. Çünki buna qədər peşəkar klublar arasında ardıcıl qələbə sayına görə əvvəlki bilinən rekord TNS-ə məxsus idi. Uels təmsilçisi 2016-cı ildə ardıcıl 27 qələbə qazanmaqla ''Ayaks''a məxsus 44 illik rekordu yeniləmişdi.

Amma sən demə Türkmənistanda Avropa mediasının tanımadığı bir klub bu göstəricidə rekordu artıqlaması ilə yeniləyib. Söhbət ''Arkadağ'' adlı klubdan gedir. Ötən il Türkmənistanda Arkadağ adlı yeni şəhər istifadəyə verildi. Onun tikintisinə hələ 2019-cu ildə başlanılmışdı. Ölkənin sabiq prezidenti Qurbanqulu Berdiməhəmmədovun göstərişi ilə yeni şəhərin eyniadlı öz komandası da yaradıldı. Nəticədə ötən ilin aprelin 1-də ölkənin ən güclü futbolçularının cəlb olunması ilə ''Arkadağ'' adlı klub yaradıldı. Təsəvvür edin, bu klub yarandığı gündən indiyə qədər keçirdiyi 33 (!!!) rəsmi oyunun hamısından qələbə ilə ayrılıb. ''Arkadağ'' ötən mövsüm Türkmənistan çempionatında 24 oyunun hamısında qalib gələrək maksimum - 72 xalla çempion oldu. Komanda ölkə kubokunda da keçirdiyi 7 rəsmi oyundan qələbə ilə ayrılaraq bu turnirin də qalibi oldu. Bu mövsüm isə ''Arkadağ'' çempionatda keçirdiyi hər 2 oyundan qələbə ilə ayrılıb. Son turda, ''Nebitçi'' ilə ev oyununda 5:0 hesablı qələbə əldə olundu.

Görəsən ''Arkadağ''ın bu fenomenal uğurundan niyə danışan yoxdu? Bu klubun ardıcıl 33 qələbəlik rekord seriyası Avropa mediasına və ''Ginnesin Rekordlar Kitabı''na nə vaxt gedib çatacaq?

ƏLİ