Dekabrın 12-də Səudiyyə Ərəbistanında Klublararası Dünya Çempionatı (KDÇ) start götürdü. 1-ci mərhələdə təşkilatçı ölkənin komandası ilə “Oklend Siti” qarşılaşdı.

"Football-plus.az" xəbər verir ki, ilk hissədə vurulan üç cavabsız qol “Əl-İttihad”ı növbəti mərhələyə çıxardı. Matçda son nöqtəni qoyan Benzema 4 KDÇ-də qol vuran ilk futbolçu oldu. Fransalı hücumçu hazırda klubların 6-cı mundialında iştirak edir. O, əvvəlki 5 turnirdə (2014, 2016, 2017, 2018, 2022) “Real”ın formasında qalib adını qazanıb. Benzemanın hazırkı komandası 2-ci mərhələdə “Əl-Əhli”yə (Misir, Afrika) rəqib oldu. Bu mərhələnin dekabrın 15-nə təyin olunan digər oyununda Leon (Meksika, Şimali və Mərkəzi Amerika) ilə “Urava Red Daymonds” (Yaponiya, Asiya) qarşılaşacaq.

1-ci mərhələ
Əl-İttihad (Səudiyyə Ərəbistanı, Asiya) – Oklend Siti (Yeni Zelandiya, Okeaniya) 3:0
Romarinyo, 29. Kante, 34. Benzema, 40.