Srağagün Asiya Çempionlar Liqasının (AÇL) 1/4 finalının cavab oyununda Səudiyyə Ərəbistanının iki təmsilçisi – “Əl-Hilal” ilə “Əl-İttihad” üz-üzə gəldi.

"Football-plus.az" xəbər verir ki, evdə keçirdiyi ilk görüşdə 2 cavabsız qolla üstün olan “Əl-Hilal” cavab oyununda da eyni hesabla qalib gələrək yarımfinala yüksəldi. İlk baxışdan burda qeyri-adi bir şey yoxdu. Amma srağagünkü oyunda “Ginnesin Rekordlar Kitabı”na düşən yeni bir dünya rekordu qeydə alındı. Məsələ burasındadı ki, “Əl-Hilal” rəsmi oyunlarda ardıcıl 28-ci qələbəsini qazandı! Bəli, buna qədər futbol tarixində ardıcıl 28 qarşılaşmada qələbə qazanan komanda olmamışdı. Ötən əsrdə uzun illər bu göstəricidə rekord “Ayaks”a məxsus olub. Amsterdam nəhəngi əfsanəvi Yohan Kroyffun “at oynatdığı” vaxtlarda və “sehrbaz” ləqəbli rumıniyalı mütəxəssis Ştefan Kovaçın başçılığı altında 1971-ci il oktyabrın 3-dən 1972-ci il martın 29-na qədər keçirdiyi ardıcıl 26 oyunda qələbə qazanmışdı. Maraqlıdı ki, bu seriyanin həm birinci, həm də sonuncu oyununda “Neymegen” üzərində evdə 1:0-lıq qələbə əldə olunmuşdu. Bunların biri çempionata, digəri kuboka təsadüf etmişdi. Kroyff bu 26 oyunluq dönəmdə 33 dəfə fərqlənmişdi. “Ayaks”ın rekordu nə az, nə çox – düz 44 ildən sonra yeniləndi. Daha çox TNS kimi tanınan Uels nəhəngi “The New Saints” 2016-cı ildə - avqustun 14-dən dekabrın 30-na qədər ardıcıl 27 qələbə qazanmaqla adını futbol tarixinə yazdırdı. Bu qələbələr yalnız daxili turnirlərdə əldə olunmuşdu. Göründüyü kimi, təxminən 7 il 3 aydan sonra rekord növbəti dəfə yeniləndi. Portuqaliyalı Jorje Jezuşun çalışdırdığı “Əl-Hilal” son qələbəsiz oyununu ötən il sentyabrın 21-də daxili çempionatın 7-ci turunda səfərdə “Damak”a qarşı keçirib (1:1). Ər-Riyad təmsilçisi həmin görüşdən sonra 16-sı daxili çempionatda, 3-ü ölkə kubokunda və 9-u AÇL-də olmaqla keçirdiyi 28 qarşılaşmanın hamısından qələbə ilə ayrılıb. Qeyd edək ki, heyətində Neymar, Milinkoviç-Saviç, Mitroviç, Malkom kimi ulduzlar olan “Əl-Hilal” mövsümü hətta “qızıl het-trik”lə tamamlaya bilər. Komanda həm ölkə kubokunda, həm də AÇL-də yoluna davam edir. Daxili çempionatda isə “Əl-Hilal” sona 11 tur qalmış ən yaxın izləyicisi olan Kriştiano Ronaldolu “Əl-Nəssr”i 12 xal qabaqlayır. Yəni Ronaldonun bütün canfəşanlığına baxmayaraq, hələ ki Səudiyyə Ərəbistanının ən güclü komandası “Əl-Hilal”dı.