“Bizi bu durumdan ancaq Allah qurtara bilər” - “Red Black Army” “Qəbələ” ilə bağlı belə dedi
“Qəbələ” ötən ay ğursuz nəticələrə görə Elmar Baxşıyevlə yollarını ayırıraq, gürcüstanlı mütəxəssis Kaxaber Sxadadzeni baş məşqçi postuna gətirdi.
8 il Azərbaycanda işləmiş təcrübəli çalışdırıcı komandanı elitada saxlamağa ümidli olduğunu, “qırmızı-qaralar”ı düşdüyü durumdan çıxarmağı çox istədiyini ilk açıqlamalarında bildirmişdi. Fəqət görünən odu ki, vəziyyət heç də yaxşıya doğru getmir. Belə ki, “Qəbələ” Sxadadzenin gəlişindən sonra 3 oyun keçirib və hər birində məğlub olub. Hətta sonuncu oyunda məğlub olduğu “Sabah” yeni çalışdırıcısı Krunoslav Renduliçin rəhbərliyi altında ilk matça çıxmışdı. “Kəpəz” isə az qala hər tur aradakı fərqi artırır. Görəsən, “Qəbələ”ni bu durumdan nə xilas edə bilər? Komandanın “Red Black Army” azarkeş qrupunun rəhbərlərindən biri olan Nəriman Təbriz qəzetimizə açıqlamasında “bizi bu durumdan ancaq Allah qurtara bilər” dedi. Bəs futbol adamları bu barədə nə düşünür?
Emil Şükürov (vasitəçi/skaut):
“Əslində Sxadadzedən fantastik bir geridönüş gözləmək xəyalpərəstlik olardı. Unutmayaq ki, hər şey “Qəbələ”nin özündən asılı deyil. “Qəbələ” nəzəri cəhətdən bütün qalan oyunlarda müsbət nəticə qazansa belə, hər şey izləməkdə olduğu komandanın, yəni “Kəpəz”in nəticələrindən asılıdı. Əvvəl də demişdim ki, “Qəbələ” elitada qalmaq istəyirsə, gəncəlilərlə 32-ci turdakı şəxsi qarşılamaya qədər xal fərqini ikiyə qədər azaltmalıdı. İnanıram ki, Sxadadze oyun nizamını, fəlsəfəsini davamlı tətbiq edərsə, nəticə də gələcək. Hazırda əsas məsələ oyunçuların özünəinam hissini qaytarmaq, mübarizə əzmini yüksəltmək və hər oyuna final oyunu kimi çıxmaqdı. Bəlkə də hansısa çox təcrübəli oyunçunun transferi komandaya kömək edə bilər. Amma bu hazırda fantastika kimi görünür”.
Arif Əsədov (yığmanın baş məşqçi əvəzi):
“İndi elə bir vəziyyətdi ki, “Qəbələ” üçün çox çətindi. Çünki xal fərqi böyükdü. Ən azı “Kəpəz” 3 oyun məğlub olmalıdı ki, “Qəbələ” də bu müddət içində gəlib çatsın. Bu da çətin məsələdi. Burda ümid ancaq növbəti mövsümə qalır. Və ya ola bilər ki, elitadakı komandaların sayını artırsınlar, “Qəbələ” də qalsın. Eyni zamanda növbəti mövsümün komandasını qurmaq üçün indidən addımlar atılmalıdı. Yoxsa belə çox çətin olacaq”.
KAMAL SƏFƏR
Digər xəbərlər
