“Madriddəki ilk mövsümümdə Avropa Liqasını qazandıq. Gözəl bir hekayə idi. İlk gündən bu turniri qazana biləcəyimizə inanırdım. Sona qədər mübarizə aparan gözəl bir komandamız var idi. Hesabı açdığımız oyunlarda məğlub olmağımız, demək olar, mümkün deyildi. Ona görə də qələbələri sıralayırdıq. Yadımdadı ki, qrupda “Seltik”ə qarşı oyunlar çətin keçmişdi. Səfərdə onları mənim vurduğum qolla məğlub etmişdik. Finalda Byelsanın “Atletik”i ilə qarşılaşmışdıq. Onun təməllərini qoyduğu “Atletik” indiyə qədər də güclü komandadı. Həmin vaxt heyətlərində Munyain, Xavi Martines kimi isimlər var idi. Amma Buxarestdə onları Falkaonun əla oyunu sayəsində 3:0 yenmişdik. Həmin gün təkcə Falkao yox, hamımız yaxşı oynamışdıq. AL kuboku həqiqətən də deyildiyi qədər çox ağır imiş. Onu qaldırmaq çətin idi. Hələ də o günləri xatırlayarkən duyğulanıram. Çünki uzun və ağır bir yolun sonu zəfərlə başa çatmışdı. Doğulduğum, böyüdüyüm, yetişdiyim yer “Qalatasaray”dı. Amma “Qalatasaray”dan öncə özümü “Atletiko”nun əfsanəsi sayıram. Simeone sağ olsun, bu yaxınlarda İstanbulda məni ziyarət etməyə də gəldi. Mənim üçün çox nəzakətli bir davranış idi. Komandamın məşqindən öncə meydana çıxıb oyunçularımın əllərini bir-bir sıxıb onlarla söhbət etdi. “Atletiko”da olduğum dönəmdə Simeonenin bizə verdiyi taktiki göstərişlər, bizə aşılamaq istədiyi mübarizə əzmi həmişə yadımdadı. Mən bir şeyə inanıram və oyunçularıma da hər zaman bunu deyirəm. Onlara “hansı sistemlə və ya taktika ilə oynamağınızdan asılı olmayaraq, hər şey sizin təkbətək mübarizələrdəki təmasınızdan, coşqunuzdan asılı olacaq” deyirəm. Təmasa və ya təkbətək mübarizəyə hazır deyilsizsə, deməli, heç bir sistemin faydası olmayacaq. Bunun təməlində məhəllə futbolu yatır. Uşaq vaxtı məhəllədə oynayarkən driblinq etməyə, təkbətək mübarizədə uduzmamağa, topu itirməməyə çalışırdıq. Peşəkar futbolda da bunların hamısı keçərlidi. Yalnız bunları etdikdən sonra sistemi, müdafiəni və ya başqa şeyləri müzakirə etmək olar. Çox xəyalpərəst insanam. Bu mövsüm mütləq “Eyupspor”u elitaya daşımaq istəyirəm. Sonra da ən qısa müddətdə İstanbulun bu gözəl rayonuna avrokubok matçı qazandırmaq istəyirəm”.