Qonşu pillələrdə qərarlaşan komandaların dueli maraqla gözlənilirdi.

“Zirə” qələbə qazanıb, liderlər qrupundan qopmamağı, “Turan Tovuz” da qəsəbə təmsilçisinə yaxınlaşmağı planlaşdırırdı. Oyuna maraq böyük olmasa da, azsaylı fanatlar gözəl atmosfer yaratmağı bacarmışdı. Həm Tovuzdan gələn azarkeşlər, həm də “Qartallar” komandasını irəli səsləyir, qarşılaşmaya maraq qatırdı.

Oyun qonaqların üstünlüyü ilə başladı. Elə ilk təhlükəli hücumda hesab açıldı. Serranonun gözəl ötürməsini Pusi qolla tamamladı. Baş hakim qolu qeydə alsa da, VAR təxminən 6-7 dəqiqə yoxlama apardı və nəticədə Rəvan Həmzəzadə mərkəzi göstərdi. Meydan sahibləri qolun şokundan ayılmadan qərblilər yenidən irəli atıldı. Pusi Ayxan Quseynovu zərbə mövqeyinə çıxardı. Ayxanın qüvvətli zərbəsini qolkiper dəf etdi. Hissənin sonları da eyni məcrada davam etdi. 40-cı dəqiqədə İsmayıl Zülfüqarlının ötürməsini Fərid Nəbiyev zərbə ilə tamamladı. Lakin yenə Tyaqo Silva dueldən qalib ayrıldı. 43-cü dəqiqədə isə “Zirə” azlıqda qaldı. Serranonun baxımlı ötürməsindən sonra Zülfüqarlı qapıçı ilə təkbətək çıxmağa yaxın oldu. Cibrilla onun qarşısını yalnız kobudluqla kəsməyi bacardı və qarşısında birbaşa qırmızı vərəqə gördü. İlk yarıya əlavə olunan son dəqiqədə Serrano bu dəfə özü qapını yoxladı. Amma meydan sahiblərinin portuqaliyalısı yerində idi.

İkinci hissə də eyni məcrada start götürdü. Zülfüqarlı cinahda fəallığı ilə seçilirdi. 55-ci dəqiqədə onun zərbəsi qapıdan az fərqlə aralı keçdi. Bundan sonra “Zirə” oyunda dönüş yaratmağı bacardı. Sadıxovun reydindən sonra top Sumanın önünə düşdü. Onun zərbəsini qapıçı dəf etdi. Həmin epizodun məntiqi davamında meydan sahibləri penalti qazandı. Ötən oyunun sonunda topu tirə vuran Şəhriyar Əliyev bu dəfə tovuzluların qapısına penalti təyin olunmasına səbəbkar oldu. Topun arxasına komandanın son vaxtlar ən yaxşılarından olan Ceyhun Nuriyev keçdi. O, dəqiq zərbə ilə hesabı bərabərləşdirdi – 1:1. Qoldan sonra dərhal irəli atılan “Turan Tovuz” Quseynovla irəli keçməyə yaxın oldu. Onun qüvvətli zərbəsini Silva çətinliklə küncə çıxardı. Meydan sahiblərinin buna cavabı da gecikmədi. Nuriyevin baxımlı zərbəsini Aydın Bayramov dəf etdi. Lakin zərbə onun üzünə tuş gəldiyindən qolkiper yerdə qaldı. O, oyunu davam etdirə bilmədi. Əvəzində Tərlan Əhmədli meydana daxil oldu. Sonda tərəflərin səylərinə baxmayaraq, bərabərlik pozulmadı.

Gözdən qaçmadı
* “Zirə”nin yeni transferi Sezar Meza Kolli matçı tribunadan izləyirdi.
* Ayxan Abbasov VAR epizodunda “İnqilab, çıxıb gedək? 5 dəqiqə VAR olur?”, - deyə 4-cü hakimə etirazını bildirdi.
* “Turan Tovuz”un qapıçısı Aydın Bayramov zədələnərkən “Zirə”nin azarkeş qrupu “Qartallar” qolkiperin adını səsləyərək, ona dəstək nümayiş etdirdilər.
* İlkin Muradov Ayxan Quseynovla mübarizə zamanı vulqar ifadə ilə yavaş oynamasını istədi. Oyunu televizorda izləyənlər də İlkin biabırçı ifadəsini eşitdi.

İSMAYIL XEYRULLAYEV