Tura Azərbaycan derbisi ilə yekun vurulacaq. "Neftçi" doğma meydanda "Qarabağ"la üz-üzə gələcək.

Matçın baş hakimi Elçin Məsiyevdi. Ədalət təmsilçisi cari mövsümdə hər iki komandanın bir oyununu idarə edib. Belə ki, 7-ci turda “Qarabağ”ı qəbul edən “Qəbələ” çox gərgin mübarizə sonucunda 1:2 hesabıyla uduzmuşdu. Bu matçda Kevin Medina təcavüzkar davranışa, “qırmızı-qaralar”ın məşqçisi Rasim Ramaldanov meydana daxil olaraq rəqib oyunçuya aqressiv şəkildə təzyiq göstərdiyinə görə “qırmızı” vərəqə almışdı. “Qarabağ”ın baş məşqçisi Qurban Qurbanov da texniki zona qaydalarını pozduğu üçün sarı vərəqəylə cəzalandırılmışdı.

Məsiyevin “Neftçi” ilə yolu isə Mehdi Hüseynzadə adına Sumqayıt şəhər stadionunun açılış günü kəsişib. “Ağ-qaralar” anşlaqla müşayiət olunan həmin oyunda 1:2 hesabıyla uduzub, referi son dəqiqələrdə Ninqanın Matiasa qarşı kobudluğuna görə VAR-ın da yardımı ilə penalti təyin edib.

ƏSƏD SEYİDOV