“Köhlən atlar” srağagün gecəyarısı tarixinin ən vacib matçlarından birinə çıxdı.

“Qarabağ” bu qarşılaşmada məğlub olmamalıydı. “Köhlən atlar”ı çətin 90 dəqiqə gözləyirdi. Havanın soyuq olması vəziyyəti bir az da qəlizləşdirirdi. Stadionda elə şaxta var idi ki, Qurban Qurbanov üzü qıpqırmızı olmuşdu.

Oyun “köhlən atlar”ın hücumları ilə başladı. Bizimkilər ənənəvi oyun tərzini sərgiləyirdi ki, bu da işə yaradı. Yankoviçin meydanın dərinliyindən ötürməsindən sonra Juninyo təxminən 40 metr irəliləyərək “Molde”ni məyus etdi. Hər şey bizim xeyrimizə idi. Komandamız sərfəli hesabı təmin etmişdi. Hissə “köhlən atlar”ın üstünlüyü ilə başa çatdı.

İkinci hissədə isə ağdamlılar özünə bənzəmirdi. “Qarabağ” müdafiə olunurdu. “Molde” isə ardıcıl hücumlar qururdu. Lakin Lunyovun möhtəşəm performansı sayəsində rəqib fərqlənə bilmirdi. Nəhayət, 82-ci dəqiqədə Eriksen hesabı bərabərləşdirdi. Qoldan sonra “Qarabağ” irəli atıldı. 86-cı dəqiqədə Elvin qola çox yaxın oldu. Lakin qolkiper onun fərqlənməsinə imkan vermədi. 87-ci dəqiqədə isə Eriksen dublunu rəsmiləşdirdi. Pley-off şansını itirmək üzrə olan “Qarabağ”ın hücuma atılmaqdan başqa yolu yox idi. Uzatma dəqiqələrində bəxt üzümüzə güldü. Elvin ötürdü, Bəhlul bitirdi.

Beləliklə, oyun 2:2 hesabı ilə başa çatdı. İndi hər şey “Qarabağ”dan asılıdı. Çempionumuz “Həkken”i məğlub etsə, Avropa Liqasınanın pley-offuna vəsiqə qazanacaq.

Gözdən qaçmadı
* Ekrandan göründüyü qədəri ilə oyunu maksimum 50 azərbaycanlı azarkeş izləyirdi.
* Oyun iki dəfə başladıldı. Referi ilk fiti səsləndirəndən sonra görüşü dayandırdı. Belçikalı oyunu tez başlatdığının fərqinə vardı. Təqribən 30 saniyə sonra matçın start fitini səsləndirdi.
* 40-ci dəqiqədə hakim müvazinətini itirərək yerə yıxıldı. Ayağını dartan referiyə həkimlər yardım etdi. Bundan sonra belçikalı oyunu davam etdirə bildi.

İLKİN SULTANLI