“Qarabağ” 2022/23 mövsümün qalibi oldu. “Köhlən atlar” premyer-liqanın 34-cü turunda “Səbail”i 3:0 hesabıyla məğlub edərək titula sahib çıxdı. Bununla da ağdamlılar Azərbaycan çempionatları tarixində 10-cu dəfə çempionluq sevinci yaşadı.

Oyundan sonra baş məşqçi Qurban Qurbanov belə bir fikir səsləndirdi ki, oyunçuları bu il çox əziyyət çəkib. Onun sözlərində həqiqət var. Çünki “köhlən atlar” 3 turnirdə mübarizə aparırdı. Bu səbəbdən də cari mövsümdəki uğur başqalarıyla müqayisədə daha çətin əldə olundui. Gəlin, Ağdam təmsilçisinin çempionluq yoluna nəzər salaq.

Hər şey yaxşı başladı
Mövsümün əvvəlinə nəzər yetirsək, “Qarabağ” çempionata fırtına kimi başladı. Qurban Qurbanovun komandası ardıcıl 13 turda qələbə qazanmaqla bəlkə də klub tarixinin rekorduna imza atdı. Elə ilk 13 turdan sonra “Qarabağ”ın mövsümün sonunda çempion olacağı bəlli idi.
Yeganə rəqib “Sabah” idi

Mövsümün gedişindən bəlli idi ki, bu çempionatda “Qarabağ” hegemondu. Lakin “Sabah” bu fikirlə razılaşmırdı. Murad Musayevin komandası “köhlən atlar”la ilk görüşdən iddiasını ortaya qoydu. 6-cı turda “Azərsun Arena”da komandaların ilk dueli baş tutdu. Bu görüşdə 7 qol vuruldu və “Qarabağ” 4:3 hesablı qələbə qazandı. Mövsüm ərzində Qurban Qurbanovun komandasını ilk büdrədən kollektiv də məhz “bayquşlar” oldu. Masazırda keçirilən görüşdə hesab açılmadı. 3-cü dövrədəki qarşılaşmada da Murad Musayevin komandası “köhlən atlar”a təslim olmadı – 1:1. Artıq “Qarabağ” – “Sabah” mübarizəsində gərginlik son həddə çatdı. Təsadüfi deyil ki, 30-cu turdakı dueldə Masazır klubu tarixində ilk dəfə ağdamlıları məğlub etdi. Bu, “köhlən atlar”ın çempionatda hələlik yeganə yenilgisidi. Göründüyü kimi, premyer-liqada “Qarabağ”a yeganə rəqib yalnız “Sabah” oldu.

Çempionluq şansı sual altında idi
Murad Musayevin komandasına məğlubiyyət “Qarabağ”da müəyyən ruh düşkünlüyü yaratdı. “Zirə” ilə heç-heçədən sonra artıq ictimaiyyətdə belə fikir formalaşmışdı ki, “Sabah”ın Qurban Qurbanovun komandasına çatmaq ehtimalı var. Lakin “köhlən atlar” təxminləri alt-üst etdi. Əvvəlcə əzəli rəqib “Neftçi”, daha sonra ardıcıl 6 görüşdə məğlub olmayan “Qəbələ” üzərində qələbə əldə olundu. 34-cü turda isə autsayder “Səbail”dən alınan 3 xal çempionluğu rəsmiləşdirdi.

Beləliklə, uzun və çətin marafonda ağdamlılar qələbə qazanaraq 2 ulduzlu ilk komanda kimi adını futbol tariximizə yazdırdı.

“Qarabağ”ın çempion olduğu mövsümlərdəki göstəriciləri

1993 20 11 7 2 25-11 40*
2013/14 36 21 9 6 66-21 72
2014/15 32 20 8 4 51-28 68
2015/16 36 26 6 4 66-21 84
2016/17 28 19 5 4 46-14 62
2017/18 28 20 5 3 37-13 65
2018/19 28 20 6 2 65-21 66
2019/20 20 13 6 1 34-7 45**
2021/22 28 21 6 1 72-13 69
2022/23 34 27 6 1 87-22 87
* - qələbəyə görə 3 xal hesablanıb.
* - koronavirus üzündən mövsüm yarımçıq qalıb.

İLKİN SULTANLI