“Bütün bazarlar kimi, futbol bazarında da qiymətlər bir anın içində formalaşmır. Bu məsələyə təkcə “Braqa” ilə oyunlar prizmasından yanaşmaq düzgün deyil. Artıq uzun müddətdi “Qarabağ”a maraq var. Bunu alınan və alınmayan transfer xəbərlərindən də görmək mümkündü. “Braqa” ilə oyundan sonra “Qarabağ”a maraq bir qədər də artacaq. Artıq komandamız yaz mərhələsinə vəsiqə qazanır və daha ciddi rəqiblərlə qarşılaşır, “Bayer 04” ilə qrupda yox, bir addım irəlidə - pley-offda üz-üzə gəlir. Amma söhbət “Qarabağ”ın futbolçularının top liqaların klubları üçün maraq kəsb etməsindən gedirsə, məncə, bundan ötrü daha ciddi nəticələr olmalıdı. Nəticələrdən əlavə bizim çempionatın səviyyəsi də bir xeyli artmalıdı. Məsələn, Avropada ayda iki dəfə oynamaqla və həmin görüşlərdə yaxşı nəticə göstərməklə top liqaların diqqətini cəlb etmək çox çətindi. Bunun üçün çempionatımızın səviyyəsi, reytinqi daha yüksək qiymətləndirilməlidi. Əks təqdirdə çətin olacaq. Azərbaycan klubundan, hətta “Qarabağ”dan belə birbaşa Avropanın “top-5” ölkələrinin klublarına getmək çox çətin olacaq. Bu günə kimi Azərbaycandan “böyük beşlik” ölkələrinə transfer olmayıb. Doğrudu, bundan sonra olmaq şansı daha çoxdu. Bu gün “Qarabağ”ın hansısa futbolçusunun orda peyda olmaq şansı xeyli yüksəkdi. Ancaq rahat şəkildə deyiləcək bir şey də deyil. Hazırkı inkişafı davam etdirməli və çempionatın səviyyəsinin artmasına daha da diqqət yetirməliyik. Ona görə də bizə daha çox Çindən və ərəb ölkələri klublarından təkliflər olur. Ya da deyək ki, yuxarı-aşağı “Qarabağ” səviyyəsində olan, top futbol ölkəsi olmayıb amma oranın top klubları olan, məsələn, “Ludaqorets”, “Legiya” və başqa bu kimi komandalardan təklif gəlir. Fəqət “böyük beşlik”dən danışırıqsa, təəssüf ki, olmur. “Qarabağ”ın uğurlarına baxmayaraq, yaxın zamanlarda bunu gözləmirəm. Çünki hələ tezdi”.