Mövsümün əvvəlində hay-küylü şəkildə “Fənərbaxça”dan “Real”a transfer olunan Arda Gülərin İspaniyadakı karyerası heç də uğurlu şəkildə irəliləmir.

"Football-plus.az" xəbər verir ki, gənc ulduz həm yaşadığı çoxsaylı zədələr, həm də baş məşqçi Karlo Ançelottinin ona az şans verməsi üzündən “Real”da xoşbəxt deyil. İspaniyanın ünlü “As” nəşrinin son sayında türkiyəli futbolçunun durumu ilə bağlı yazı dərc olunub. Orda Ardanın üzünün gülmədiyi, istedadını sərgiləyə bilmədiyi üçün komanda daxilində özünü xoşbəxt hiss etmədiyi, hətta son olayın ardından depressiyaya düşdüyü iddia olunub. Bilindiyi kimi, Arda “Sevilya” ilə oyunun sonlarına yaxın Ançelottinin göstərişi ilə formanı geyərək meydanın kənarına gəlmişdi. Gülər doğum günündə meydana çıxmaq üzrə olarkən “Real” Luka Modriçlə qol vurmuş və Ançelotti türkiyəlini meydana buraxmaq qərarından vaz keçmişdi. Ardanın bu olaya çox qəzəbləndiyi məlum olub. Onu üzən məqam komandadakı digər gənc futbolçularla müqayisədə daha az şans qazanmasıdı. Bu arada İspaniya mətbuatında Ardanın mövsümün sonunda “Real”dan ayrıla biləcəyi ilə bağlı xəbərlər yenidən artıb. Madrid nəhəngi bu futbolçunu daha çox oynamaq və təcrübə qazanmaq şansı olan bir komandaya icarəyə vermək niyyətindədi. Əvvəlki aylarda da buna bənzər xəbərlər çıxmış və bu futbolçuya bir çox kollektivin maraq göstərdiyi iddia edilmişdi. Son xəbərlərdə Ardaya maraq göstərən klubların siyahısına La Liqa təmsilçilərindən “Sevilya” ilə “Las-Palmas”ın da qoşulduğu deyilir. Xüsusilə “Las Palmas” variantı “Real” rəhbərliyinə daha cəlbedici görünür. Çünki bu klubun Arda ilə bağlı ciddi planları var və ən əsası onun daimi oyun praktikasına malik olacağına zəmanət verir.