Arda Gülərin Madriddə şanssız günləri davam edir.
“Football-plus.az” xəbər verir ki, Türkiyə futbolunun yeni gənc ulduzu bu yay transfer olunduğu “Real”da heç cür debüt edə bilmir. Bilindiyi kimi, 18 yaşlı yarımmüdafiəçi ilk dəfə ABŞ toplanışında zədələnmiş və Madridə qayıdaraq avqustun 14-də menisk əməliyyatı keçirmişdi. Sentyabrın əvvəllərindən fərdi məşqlərə start verən Gülər sentyabrın 21-dən etibarən isə komanda şəklində məşqlərdə də işitrak etməyə başlamışdı. İspaniya mətbuatı onun debütünün hansı oyuna təsadüf edəcəyi üzərində baş sındırırdı. Bu həftəiçi La Liqada 7-ci turun oyunları keçirilir. “Real” dünən öz meydanında “Las Palmas”la qarşılaşdı. Srağagün səhər məşqindən sonra baş məşqçi Karlo Ançelotti bu oyuna həsr olunmuş mütbuat konfransında iştirak etdi. Təbii ki, jurnalistlər ona ilk növbədə Ardanın durumu ilə bağlı sual verdilər. Ünlü italiyalı mütəxəssis türkiyəli vunderkind barədə pozitiv düşüncəyə malik olduğunu göstərərək bunu dedi: “Arda zədədən yaxşı qayıdıb. Çox istəklidi. Durumu qaydasındadı və oynamağa hazırdı”.

Ançelottinin bu sözlərindən sonra belə güman edilirdi ki, Ardanın adı ilk dəfə iştirak ərizəsinə salınacaq. Hətta oyunun axarından asılı olaraq futbolçunun 2-ci hissədə şans qazanmaq ehtimalı da var idi. Amma Ançelottinin mətbuat konfransından təxminən saatyarım sonra şok xəbər gəldi. Sən demə, səhər məşqinin ardından Arda əzələsində ağrılar hiss etdiyi üçün yenidən klubun tibbi personalına müraciət etməli olub. Onun tibbi müayinəsindən sonra isə sol ayağının arxa əzələsində zədə aşkarlanıb. Dərhal klubun saytında da bu barədə məlumat yerləşdirildi. Sən demə, Ançelotti mətbuat konfransına yollanarkən Ardanın ağrılarının olmasından və həkimlərə müraciət etməsindən xəbərsizmiş. Kəsəsi, Türkiyə yığmasının üzvü yenə ən yaxşı halda 3 həftəliyə, ən pis halda bir aylığa sıradan çıxıb! İspaniya mətbuatının iddiasına görə Ardanın “Jirona”, “Napoli”, “Osasuna”, “Sevilya”, “Braqa” və “Barselona”ya qarşı oyunlarda iştirakı gözlənilmir. Bu arada Madrid nəhənginin aparıcı üzvlərindən olan David Alabanın Ardaya dəstək verməsi diqqəti çəkib. Təcrübəli avstriyalı futbolçu öz “instaqram”ının hekayə bölümündə Arda ilə olan şəklini paylaşaraq “tezliklə sağal qardaşım, daha güclü geri dönəcəksən” ifadəsini yazıb.