Bu yay ''Fənərbaxça''dan ''Real''a transfer olunmaqla Türk dünyasının fəxrinə çevrilən Arda Gülərdən yeni xəbər var. 18 yaşlı yarımmüdafiəçi nəhayət, komanda ilə birlikdə məşqlərə başlayıb.

Məlum olduğu kimi Arda ''Real''a transfer olunduqdan bir müddət sonra meniskindən zədə almışdı. ABŞ toplanışından erkən ayrılaraq Madridə qayıtmalı olan türkiyəli vunderkind avqustun 14-də əməliyyat olunmuşdu. Əməliyyatdan 2 həftə sonra fərdi məşqlərə başlayan Gülər dünən ilk dəfə komanda ilə birlikdə məşq etdi.

''Real''ın rəsmi səhifələrindəki məşqlə bağlı paylaşımlarında da Ardanı görmək mümkündü. İndi hər kəsi bir sual maraqlandırır: Türkiyə yığmasının üzvünün debütü hansı oyuna təsadüf edəcək?

Sabahkı Madrid derbisində onun iştirakı demək olar, mümkünsüzdü. Həftəiçi La Liqada daha bir tur oynanılacaq. Həmin vaxt ''Real'' ''Las Palmas'' ilə qarşılaşacaq. AS nəşrinin yazdığına görə Ardanın adı ilk dəfə həmin matçda iştirak ərizəsinə düşə bilər. Hətta oyunun gedişatından asılı olaraq o, ikinci hissədə şans da qazana bilər. Amma belə görünür, Ardanın debütü üçün ən real tarix 30 sentyabrdı. Həmin vaxt Madrid nəhəngi səfərdə ''Jirona'' ilə qarşılaşacaq.

ƏLİ