Arda Gülərin Madrid karyerası olduqca şanssız və qəribə şəkildə davam etməkdədi.

''Real''ın bu yay 20 milyon avroya ''Fənərbaxça''dan transfer etdiyi gənc türkiyəli ulduz hələ də yeni klubunda debüt etməyib. Qısa ''Real'' karyerasında artıq 2 dəfə zədələnməyə macal tapan 18 yaşlı futbolçu son dönəmlərdə zədədən qayıdaraq komanda ilə məşqlərə başlamışdı. Amma ''Rayo Valyekano'' və ''Braqa''ya qarşı son iki rəsmi oyunda adı iştirak ərizəsində olmasına baxmayaraq Karlo Ançelotti ona şans vermədi. Bu arada ''Mundo Deportivo'' nəşri bu futbolçu ilə bağlı yeni xəbər paylaşıb. Nəşrin yazdığına görə Arda ağrılar hiss etdiyinə görə ''Braqa''ya qarşı matçın ertəsi günü, yəni çərşənbə axşamı səhər məşqində iştirak etməyib! Hələ ki, klubdan futbolçunun durumu ilə bağlı rəsmi açıqlama verilməyib.

Belə güman olunur ki, əlavə riskə yol verməmək üçün Arda komanda ilə məşqdən azad edilib. Ançelottinin də məhz bu üzdən, yəni Arda tam sağalmadığı üçün ona şans vermədiyi qeyd olunur. Bundan başqa türkiyəli ulduzun şənbə günü ''Valensiya''ya qarşı oyunun iştirak ərizəsinə salınmayacağı da bildirilir.

ƏLİ