Məlum olduğu kimi, Acun Ilıcalı ötən həftə böyük maraqla izlənilən “Survivor” şousuna Ronaldinyonu dəvət etmişdi.

"Football-plus.az" xəbər verir ki, “Qızıl top”un qalibləri arasında olan sabiq futbol ulduzunun şouya qatılması böyük ajiotaja və marağa səbəb olmuşdu. Ilıcalı Ronaldinyo ilə bir komanda yaradaraq ayaq voleybolunda Sərcan Yıldırım – Yasin Obuz ikilisini asanlıqla məğlub etmişdi. Ronaldinyo özü də həmin şoudakı görüntülərini 75 milyon izləyicisi olan “instaqram” səhifəsində paylaşmışdı. Bu arada ünlü türkiyəli şoumenin verilişdə iştiraka görə dünya ulduzuna hansı məbləği ödədiyi məlum olub. “Mediotiempo”nun xəbərinə görə, Acun Ronaldinyoya 150 min dollara yaxın pul ödəyib! Bundan başqa, Ilıcalı öz səhifəsindəki paylaşımında həm təklifi qəbul edən Ronaldinyoya minnətdarlıq bildirdi, həm də onu sahibi olduğu “Hall Siti”nin oyununa dəvət etdi. Bu arada Acunun srağagün UEFA prezidenti Aleksander Çeferinlə sürpriz bir təkbətək görüş keçirdiyini də bildirək. Türkiyəli ünlü iş adamı həmin görüşdən çəkilən şəkli öz “instaqram” səhifəsində paylaşaraq Çeferinə qonaqpərvərliyinə görə təşəkkür edib.

Yeri gəlmişkən, “Hall Siti”nin martda toplanış keçmək üçün Antalyaya gələcəyi məlum olub. Klubun rəsmi saytında verilən məlumatda qeyd olunub ki, toplanış martın 18-23-ü aralığında baş tutacaq. Bundan başqa, Acun xüsusi təyyarə ilə “Hall Siti”nin 100 azarkeşinə Antalyaya gəlmək fürsəti yaradacaq. Onlar həm istirahət edib şəhəri gəzəcək, həm də sevimli komandalarının məşqlərini izləyə biləcəklər. Bu, “pələnglər”in Acun tərəfindən satın alınandan sonra Türkiyəyə 3-cü gəlişi olacaq. Ötən yay da Ilıcalı bənzər şəkildə ingiltərəli fanatların Türkiyəyə gələrək burda tətil keçirməsinə şərait yaratmışdı.

Martın 2-də “Preston”la qarşılaşacaq “Hall Siti” çempionşipdə topladığı 55 xalla 6-cı pillədə qərarlaşıb. Komandanın hələ də premyer-liqaya yüksəlmək üçün yaxşı şansı var.