Son dönəmlərdə başqa ölkələrdə futbola qoyduğu sərmayə ilə adından söz etdirən məşhur türkiyəli iş adamı və şoumen Acun Ilıcalı ilə bağlı növbəti maraqlı xəbər var.

"Football-plus.az" xəbər verir ki, 2022-ci ilin yanvarında çempionşip təmsilçisi “Hall Siti”nin sahibinə çevrilən, ötən ilin iyununda isə İrlandiya təmsilçisi “Şelburn”un səhmlərinin böyük hissəsini ələ keçirən Acun indi də çox gözəl anladığı sahə olan televiziyaya sərmayə qoymağa hazırlaşır. 54 yaşlı Acun Almaniyanın tanınmış idman kanallarından olan “Sport 1”in hissələrini ələ keçirmək üzrədi. Bu məlumatı kanalın əvvəlki sahibi olan “Highlight Communications” şirkəti verib. Məlumatda qeyd olunub ki, Ilıcalı 30 milyon avro qarşılığında kanalın hissələrinin 50 faizinə sahib çıxacaq! “Royters” agentliyinin məlumatına görə, artıq kanalda əsas söz sahibi Ilıcalının sahibi olduğu “Acunmedya” şirkəti olacaq. Kanalda idman verilişləri və idmana aid realiti-şoular yayınlanacaq. Acun ilk növbədə “Sport 1”də “Eksatlon” realiti-şousunu yayınlamaq niyyətindədi. Almaniyanın “BNN Breaking” saytında bu olayla bağlı paylaşılan xəbərdə bunlar qeyd olunub: “Bu sadə bir anlaşma yox, dünyanın iki ən yaxşı şirkətinin bir araya gəlməsidi. Gələcəyə hesablanmış çox cəsur bir addımdı. Coğrafi və mədəni maneələr aşılaraq ən yaxşı idman, əyləncə verilişləri bütün dünya izləyicilərinə təqdim olunacaq”.
Televiziya sahəsində Almaniya və Türkiyənin ən yaxşı şirkətlərinin bir araya gəlməsi ilə “Sport 1” kanalında yeni dönəmin başlayacağı güman olunur. Eyni zamanda bu addımın iki ölkə arasında müəyyən mədəni körpü rolunu oynayacağı da gözlənilir. Mərkəzi İsveçrədə yerləşən “Highlight Communications” hələ ötən yay kanalın yeni inkişaf mərhələsinə qədəm qoyması məqsədilə onun hissələrini satışa çıxarmışdı.

Yeri gəlmişkən, Acun Ilıcalının böyük maraqla izlənilən “Survivor All Star” yarışmasında srağagün ünlü bir qonaq yer aldı. Belə ki, braziliyalı əfsanə, “Qızıl top”un qalibi Ronaldinyo şouya qatılaraq ayaq voleybolu oynadı. Şounun srağagün efirə gedən bölümündə Acun ilə Ronaldinyo bir komanda yaradaraq Sərcan Yıldırım – Yasin Obuz ikilisinə qarşı oynadılar. Ayaq voleybolunda Acun – Ronaldinyo ikilisi çox rahat şəkildə qələbə qazandı. “Sambaçı” gözəl hərəkətlərlə qazandığı xallarla izləyiciləri məst etdi. 2010-cu ildə “Bursaspor”un heyətində Türkiyə çempionu olmuş Sərcanın oyundan sonra “Ronaldinyo ilə aramızda əsas fərq ondadı ki, o, Anadolu klubunu çempion etməyib. “Barselona” ilə çempion olmaq asandı” deyərək şoudakıları və izləyiciləri güldürdü.