Acun Ilıcalı daha bir klubun sahibinə çevrildi! - ŞƏRH
Türkiyəli məşhur şoumen Acun Ilıcalı, deyəsən, klub almağı hobbiyə çevirib.
"Football-plus.az" xəbər verir ki, çempionşip təmsilçisi “Hall Siti”nin sahibi olan Ilıcalı indi də yeni bir klubun sahibinə çevrilib.
54 yaşlı şoumen sosial şəbəkədəki səhifəsində İrlandiya təmsilçisi “Şelburn”un səhmlərinin böyük hissəsini satın aldığını açıqlayıb:
“Hall Siti” ilə başlayan futbola güclü sərmayə qoyuluşumuz İrlandiyanın köklü klublarından olan “Şelburn”un hissələrini almağımızla davam edir. Hədəfimiz “Şelburn”la avrokuboklara qatılmaq, önəmli uğurlar əldə etmək və dünya futboluna istedadlı futbolçular qazandırmaqdı. İrlandiya futboluna, bu klubun potensialına və fanatlarına inamım sonsuzdu”.
Əslində Acunun “Hall Siti”dəki gənc oyunçuların təcrübə toplaması üçün başqa bir klubu almaq istəyi çoxdan bəlli idi. Fevralda onun İrlandiyanın digər təmsilçisi “Dandolk”u almaq istədiyi və bu sövdələşmənin ona 20 milyon avroya başa gələcəyi deyilirdi. Həmin vaxt Ilıcalının planı baş tutmasa da, göründüyü kimi, bu dəfə istəyinə çata bildi. İşin maliyyə detalları barədə hələ ki məlumat yoxdu.
“Şelburn”a gəlincə, 1895-ci ildə yaradılan bu klub İrlandiyanın 13 qat çempionudu. Son çempionluğu 2006-da qazanıb. Yaxın keçmişin tanınmış irlandıyalı vingeri Damyen Daffın çalışdırdığı bu klub cari mövsümdə 19 oyuna 29 xal toplayıb. Dublin təmsilçisi 10 kollektivin iştirak etdiyi turnirdə 5-ci pilllədə qərarlaşıb.
Digər xəbərlər
