Türkiyəli məşhur şoumen, İngiltərə təmsilçisi “Hall Siti”nin sahibi Acun Ilıcalı ilə bağlı növbəti maraqlı xəbər yayılıb.

Football-plus.az xəbər verir ki, şayiələrə inansaq, Ilıcalı İrlandiya təmsilçisi “Dandolk”u satın almaq üçün danışıqlara başlayıb. Bu xəbəri srağagün İrlandiya mətbuatı ortaya atdıqdan sonra dünən İngiltərə mənbələri də Acunun bu cür işbirliyində maraqlı olduqlarını yazdılar. 53 yaşlı şoumen bir neçə ay öncə özü də etiraf etmişdi ki, yeni bir klub almaq niyyətindədi. O, “Hall Siti”də heyətə düşməkdə çətinlik çəkən gənc və istedadlı oyunçuları təcrübə toplamaları üçün həmin kluba göndərmək istəyir.

Qeyd edək ki, İrlandiyada Avropanın əksər ölkələrindən fərqli çempionat “yaz-payız” sistemi ilə keçirilir. “Dandolk” ölkənin ən tanınmış klublarından biridi və titul sayına görə 2-ci pillədədi. 1903-cü ildə yaradılan bu klub 119 illik tarixi ərzində 14 dəfə ölkə çempionu olubsa, 12 dəfə ölkə kubokunu və 7 dəfə Liqa kubokunu qazanıb. Son çempionluğunu 2019-da qazanan və ötən mövsümü 3-cü pillədə tamamlayan “Dandolk” son illərdə tez-tez prezidentini dəyişməsi ilə diqqəti çəkir. Son olaraq 2021-in noyabrından bu yana prezident vəzifəsini “Statsports” şirkətinin sahibi Şon O”Konnor icra edir. Ona qədər isə 15 ay ərzində klubu amerikalı iş adamları idarə etmişdi. Ilıcalı “Dandolk”un başına keçəcəyi təqdirdə son 11 ildə klubun 5-ci prezidenti olacaq. Hərçənd O”Konnor ötən ay verdiyi açıqlamada “Dandolk”u satmaq niyyətinin olmadığını qeyd etmişdi.