“River Pleyt” liderliyə yüksəlmək şansını əldən verdi

"Football-plus.az" Argentina Liqa Kubokunun (LK) 7-ci turunda qeydə alınan nəticələrdən sonra qruplardan birində lider yenə dəyişdi. Turun ən çox maraq doğuran oyunu isə “Superklasiko”ya təsadüf etdi.

Əvvəlki turda A qrupunda liderliyə yüksələn “İndependyente” üçün “Rasinq” ilə ev oyunu uğursuz alındı. Karlos Tevesin çalışdırdığı komanda Avelyaneda derbisində minimal hesabla məğlub oldu. Evdə alınan ikinci məğlubiyyət “İndependyente”yə liderliyi itirmək bahasına başa gəldi.

Hesabat turu ərəfəsində 2-ci yerdə olan “River Pleyt” qələbə qazanacağı halda liderliyi yenidən ələ keçirəcəkdi. Amma ölkə nəhəngi ardıcıl 3-cü dəfə rəqibi ilə heç-heçəyə razılaşdı. Rəqib isə düşmən sayılan“Boka Xuniors” idi. Bəli, Martin Demiçelisin komandası Argentina futbolunun 1 nömrəli derbisində büdrədi. Halbuki, əzəli rəqiblərin yeni mövsümdəki çıxışını müqayisə etsək, “River” daha şanslı görünürdü. Üstəlik, evdə oynayırdı. 261-ci “Superklasiko”, gözlənildiyi kimi, ev sahiblərinin üstünlüyü ilə keçdi. Amma “Boka” rəqibindən çox da geri qalmadı. Daha çox qonaqların sərt və kobud oyunu ilə yadda qalan ilk hissədə hesab açılmadı. Fasilədən az sonra 22 yaşlı hücumçu Solari “milyonçular”ı önə keçirdi. Bundan sonra qonaqlar istər-istəməz hücuma daha çox meyl etməyə məcbur oldular. Bir neçə həmlədən sonra 70-ci dəqiqədə Medina Blankonun ötürməsi ilə cavab qolunu vurdu. “River”in bundan sonra təşəbbüsü yenidən ələ alacağı gözlənilirdi. Demiçelisin komandası nə qədər çalışsa da, qapıya bir daha yol tapa bilmədi. Əzəli rəqabətdə 84-cü dəfə heç-heçə qeydə alındı. “Boka Xuniors”un indiyədək derbidən 91 dəfə qalib ayrıldığını, “River Pleyt”in isə 86 qələbə qazandığını da qeyd edək. Ardıcıl üçüncü heç-heçə “River”ə liderliyi ələ keçirmək imkanı vermədi. Xalını 13-ə artıran ölkə çempionatının son qalibi 2-ci yerdə qaldı. LK-nın yeni mövsümündə 7-ci oyunda 4-cü dəfə “sülh”ə razılaşan “Boka Xuniors” isə B qrupunda 10 xalla 7-ci yerdə qaldı.

A qrupunda isə liderliyə “Arxentinos Xuniors” yiyələndi. LK-nın son finalçısı “Platense” üzərində 3:1 hesablı qələbə qazanan Pablo Gedenin komandası 14 xalla ilk dəfə zirvəyə çıxdı. Qeyd edək ki, buna mövsümə çox yaxşı başlayan “İnstituto” ilə “Barrakas Sentral”ın qələbə qazana bilməməsinin də təsiri oldu.

Yeni mövsümə zəif başlayan “Rosario Sentral” tədricən azarkeşlərini ümidləndirir. Migel Russonun komandası turu maksimum nəticə ilə başa vurdu. LK-nın son çempionu səfərdə “Nyuellz Old Boyz”a minimal hesabla üstün gələrək A qrupunda 9-cu yerdən 7-yə yüksəldi.

B qrupunda “Qodoy Krus”un liderliyi davam edir. Daniel Oldranın komandası “İnstituto”nu səfərdə iki cavabsız qolla məğlub etdi. Liderin ilk 7 oyunda qapısını toxunulmaz saxlaması diqqəti cəlb edir. Mendosalılar artıq əsas izləyicisini 2 deyil, 4 xal qabaqlayırlar. Ona görə ki, “Estudiantes” səfərdə “Ximnasiya” ilə qolsuz “sülh”ə razılaşdı. “Tələbələr” iki xal itirməsinə baxmayarq, 2-ci yerdəki mövqeyini qorudular.

Tura hərəyə 12 xalla başlayan “Lanus” ilə “Nyuellz Old Boyz”un qələbə qazana bilməməsi daha çox “Rasinq”in işinə yaradı. İndi bu qrupda 3-4-cü yerləri 13 xala malik “Rasinq” ilə “Lanus” tutur.

qrup mərhələsi, 7-ci tur
İndependyente - Rasinq 0:1
A.Martines, 62.
River Pleyt - Boka Xuniors 1:1
Solari, 49 – Medina, 70.
İnstituto - Qodoy Krus 0:2
Altamira, 37. Gilyen, 60.
Arxentinos Xuniors - Platense 3:1
Leskano, 12. Santamariya, 27. Montyel, 71 – Pelleqrino, 80.
Ximnasiya - Estudiantes 0:0
Lanus - Banfild 1:1
Penya, 64 – M.Ximenes, 90+6.
Nyuellz Old Boyz - Rosario Sentral 0:1
Malkorra, 57.
Atletiko Urakan - San Lorenso 0:0
Sarmyento - Barrakas Sentral 0:0
Sentral Kordoba - Atletiko Tukuman 0:0
Belqrano - Talyeres de Kordoba 2:2
Reyna, 1. Meriano, 37 – R.Sosa, 31. A.Martines, 48.
Union - İndependyente Rivadaviya 4:1
Morales, 3. Pardo, 7. Qamba, 61. Luna Diale, 83 – Ramis, 45+2.
Defensa y Xustisiya - Deportivo Riestra 2:1
Tripiço, 56 – X.Errera, 9.
Veles Sarsfild - Tiqre 2:2
Pitsini, 12. B.Romero, 7 – Orteqa, 48. Forklas, 52.

A qrupu
1. Arxentinos Xuniors 7 4 2 1 13-7 14
2. River Pleyt 7 3 4 0 13-3 13
3. İndependyente 7 4 1 2 5-2 13
4. Barrakas Sentral 7 3 3 1 6-4 12
5. Talyeres de Kordoba 7 3 2 2 13-10 11
6. İnstituto 7 3 2 2 9-6 11
7. Rosario Sentral 7 3 2 2 6-7 11
8. Veles Sarsfild 7 3 2 2 9-11 11
9. Ximnasiya 7 3 1 3 9-9 10
10. İndependyente Rivadaviya 7 2 0 5 7-12 6
11. Atletiko Urakan 7 1 2 4 4-8 5
12. Deportivo Riestra 7 1 2 4 3-9 5
13. Banfild 7 0 4 3 4-10 4
14. Atletiko Tukuman 7 0 4 3 1-7 4

B qrupu
1. Qodoy Krus 7 6 1 0 10-0 19
2. Estudiantes 7 4 3 0 7-1 15
3. Rasinq 7 4 1 2 12-4 13
4. Lanus 7 4 1 2 9-5 13
5. Defensa y Xustisiya 7 3 3 1 9-6 12
6. Nyuellz Old Boyz 7 4 0 3 7-8 12
7. Boka Xuniors 7 2 4 1 7-4 10
8. Union 7 2 3 2 6-5 9
9. San Lorenso 7 1 4 2 5-8 7
10. Belqrano 7 1 3 3 8-8 6
11. Platense 7 1 3 3 3-10 6
12. Sentral Kordoba 7 1 2 4 4-7 5
13. Sarmyento 7 0 3 4 4-12 3
14. Tiqre 7 0 2 5 2-12 2

Bombardirlər: Borxa (River Pleyt), A.Martines (Rasinq) - 6, İ.Ramires (Nyuellz Old Boyz) - 5, Puebla (İnstituto) - 4