Argentina Liqa Kubokunda (LK) qrup mərhələsi sona yaxınlaşır. 9-cu turun oyunlarından sonra qruplardan birində lider dəyişdi.

“Football-plus.az” xəbər verir ki, A qrupunda tura lider kimi başlayan “River Pleyt” “Kolon”la “sülh”ə razılaşdı. Səfər oyunu Argentinanın son çempionu üçün heç də asan keçmədi. “Milyonçular” hesabda iki dəfə geri düşsələr də, hər iki halda cavab qolunu vura bildilər. Ev sahiblərinin də çətinliyi oldu: Moreyranın fasiləyə saniyələr qalarkən kobud oynaması gənc yarımmüdafiəçiyə birbaşa qırmızı vərəqə ilə meydanı tərk etmək bahasına başa gəldi. İlk hissəni hesabda 1:2 geridə başa vuran “River” say üstünlüyündən fasilədən dərhal sonra yararlandı.

Qeyd edək ki, kolumbiyalı hücumçu Borxa ikinci qolu da yarımmüdafiəçi İqnasio Fernandesin ötürməsi ilə vurdu. Amma Martin Demiçelisin komandası bir hissə azlıqda oynayan “Kolon”un qapısına bir daha yol tapa bilmədi. İki xal itkisi “River Pleyt”in qrupdakı liderliyinin yalnız bir tur çəkməsinə təsir etdi.
“İndependyente” ölkə nəhənginin büdrəməsindən maksimum yararlandı. Karlos Tevesin çalışdırdığı komanda “Barrakas Sentral”a evdə heç bir şans vermədi. 3 cavabsız qolla qalib gələn “İndependyente” ilk dəfə zirvəyə çıxdı.

A qrupunda tura hərəyə 13 xal toplamaqla başlayan üç komandadan heç biri qalib gələ bilmədi. “Atletiko Urakan” səfərdə “İnstituto”ya 1:3 hesabı ilə uduzdu. Məğlubiyyət “atletlər”i 6-cı yerə saldı. “Veles Sarsfild” isə “Kolon” kimi turu bir xalla başa vurdu. “Rosario Sentral” ilə səfər oyunu 1:1 hesabı ilə nəticələndi. İndi 14 xala malik olan “İnstituto”, “Kolon” və “Veles Sarsfild” uyğun olaraq 3-5-ci yerləri bölüşür.
B qrupunda keçirilən oyunlarda qeydə alınan nəticələrdən sonra lider dəyişməsə də, cədvəlin yuxarı pillələrində önəmli dəyişikliklər baş verdi. Tura 1-ci yerdə başlayan “Belqrano” səfərdə “Defensa y Xustisiya”dan maksimum xal aldı. Passerini ilə Ulises Sançes bir-birinə ötürmə verməklə qol vurmaq imkanı yaratdılar. 42 yaşlı Gilyermo Farrenin çalışdırdığı komanda ardıcıl ikinci qələbə ilə liderliyini qorudu.

Tura 2-ci pillədə başlayan “Sentral Kordoba” evdə “Lanus”la qolsuz heç-heçəyə razılaşdı. Autsayderlə matçda iki xal itirən kordobalılar 5-ci yerə düşdü. Onların mövqeyini isə “Qodoy Krus” ələ keçirdi. “San Lorenso” üzərində minimal hesablı qələbə qodoyluların LK-da məğlubiyyətsiz oyunlar seriyasını 9-a çatdırdı. Lider “Belqrano” da hələ ki uduzmayıb.
Nəhayət, “Boka Xuniors” iki oyunluq məğlubiyyət və üç oyunluq qələbəsizlik seriyasına son qoydu. LK-nın pley-offuna vəsiqə qazanmaq şansını möcüzəyə bağlayan ölkə nəhəngi evdə “Union”a 2:1 hesabı ilə qalib gəldi. Qonaqların müdafiəçisi Kalderonun 28-ci dəqiqədə qırmızı vərəqə alması Mariano Erronun komandasının işinə yaradı. Qeyd edək ki, “Union” on nəfərlə fasilə ərəfəsində “Boka”nın qapısına yol tapmağı bacardı. Lakin paytaxt komandası ikinci hissədə say üstünlüyündən yararlanaraq uğursuz seriyalara son qoydu. Bu qələbə “Boka Xuniors”u cədvəldə yalnız bir pillə irəli saldı. 10-cu yerə yüksələn “göy-sarılar” liderdən əvvəlki kimi 7 xal geri qalırlar.

qrup mərhələsi, 9-cu tur
Kolon - River Pleyt 2:2
Botta, 8; 26-p. – Borxa, 11; 47.
İndependyente - Barrakas Sentral 3:0
M.Ximenes, 27. L.Qonsales, 36. B.Martines, 60.
Atletiko Urakan - İnstituto 1:3
Sonyora, 5 – Albertenqo, 13. A.Martines, 21. Q.Rodriges, 69.
Rosario Sentral - Veles Sarsfild 1:1
Lovera, 68-p. – S.Kastro, 29.
Defensa y Xustisiya - Belqrano 0:2
Passerini, 59. U.Sançes, 68.
Talyeres de Kordoba - Arsenal 1:1
Bustos, 8 – Sexas, 90-p.
Qodoy Krus - San Lorenso 1:0
N.Fernandes, 64.
Sarmyento - Rasinq 1:1
Maynero, 38 - Qalyeqo, 90+3.
Banfild - Atletiko Tukuman 0:0
Sentral Kordoba – Lanus 0:0
Platense - Estudiantes 2:1
R.Martines, 15. Salasar, 90+2 – Boselli, 70-p.
Ximnasiya - Arxentinos Xuniors 3:2
Morales, 37. E.Ramires, 45+3; 49 – Qondou, 35. Avalos, 84.
Tiqre - Nyuellz Old Boyz 0:2
Martino, 83. Mey, 85.
Boka Xuniors - Union 2:1
Roxo, 7. Merentyel, 71 – Luna Diale, 42.
A qrupu
1. İndependyente 9 5 3 1 11-4 18
2. River Pleyt 9 5 2 2 17-10 17
3. İnstituto 9 3 5 1 9-5 14
4. Kolon 9 4 2 3 13-11 14
5. Veles Sarsfild 9 4 2 3 11-10 14
6. Atletiko Urakan 9 4 1 4 12-9 13
7. Talyeres de Kordoba 9 3 3 3 11-8 12
8. Banfild 9 3 3 3 6-5 12
9. Arxentinos Xuniors 9 3 3 3 14-14 12
10. Rosario Sentral 9 3 3 3 8-9 12
11. Atletiko Tukuman 9 2 5 2 5-6 11
12. Ximnasiya 9 3 2 4 9-14 11
13. Barrakas Sentral 9 3 1 5 7-17 10
14. Arsenal 9 2 2 5 8-12 8
B qrupu
1. Belqrano 9 4 5 0 14-7 17
2. Qodoy Krus 9 3 6 0 9-6 15
3. Nyuellz Old Boyz 9 4 2 3 11-6 14
4. Platense 9 4 2 3 10-12 14
5. Sentral Kordoba 9 4 2 3 7-9 14
6. Rasinq 9 3 4 2 11-11 13
7. Defensa y Xustisiya 9 3 3 3 9-8 12
8. Union 9 2 5 2 8-7 11
9. Sarmyento 9 2 5 2 6-5 11
10. Boka Xuniors 9 3 1 5 12-12 10
11. San Lorenso 9 1 6 2 6-9 9
12. Estudiantes 9 1 3 5 5-10 6
13. Tiqre 9 1 3 5 2-9 6
14. Lanus 9 0 4 5 4-10 4
Bombardirlər: Qondou (Arxentinos Xuniors), Passerini (Belqrano) – 7, Kokkaro (Atletiko Urakan) - 6.