Qış fasiləsindən sonrakı ilk turda qələbə qazana bilməyən komandaların bu dəfə 3 xal üçün mübarizə aparacağı aydın idi.

“Səbail” avrokuboklara iddialı komandalar sırasından qopmamaq, “Turan Tovuz” isə ən azı azı azarkeşlərinin könlünü oxşamaq üçün. Axı komanda ötən tur əzəli rəqibi “Kəpəz”ə uduzmuşdu. Ayxan Abbasov mətbuat konfransında artıq təkcə klublarla yox, hakimlərlə də mübarizə aparacaqlarını demişdi. İndi isə gələk oyuna. Meydan sahibləri oyuna fəal başladı. Elə qapıya ilk zərbə də “bozqurdlar”dan gəldi. Ayxanın zərbəsi Tərlan üçün çətin olmadı. 22-ci dəqiqədə Paçunun vuruşu təhlükəli olsa da, bu dəfə qapıçı yaxşı oynadı. Rəqibə ciddi pressinq tətbiq edən Abbasovun yetirmələri 23-cü dəqiqədə istəyinə çatdı. Paçunun gözəl ötürməsini Ayxan qola çevirdi - 1:0. Bir qədər sonra Ayxan yenə fərqlənməyə cəhd göstərdi. Lakin zərbəsi yetərincə qüvvətli deyildi. İlk yarıda, demək olar ki, başqa təhlükəli vəziyyət olmadı. Meydanda, sadəcə, bir komanda göründü. Diniyevin yetirmələri isə hələ də oyunun atmosferinə düşməmişdi.

İkinci hissədə meydanda nisbətən fəal “Səbail” var idi. Lakin qonaqların qapıya nə bir kəsərli zərbəsi oldu, nə də real qol vəziyyəti. Əvəzində 53-cü dəqiqədə Marandiçinin qapı qarşısına ötürməsini İsmayıl qola çevirə bilərdi. 20 dəqiqə sonra hesab arasındakı fərq artdı. Marandiçinin künc zərbəsindən qapı qarşısına göndərdiyi ötürmədən Paçu maksimum yararlandı - 2:0. “Dənizçilər” özünə gələ bilmir, tovuzlu azərkeşlərin sevinci isə stadionu silkələyirdi. Yalnız 81-ci dəqiqədə Qonsalvesin səhvindən istifadə edən Pedro fərqi minimuma endirməyi bacardı. Bu qolla məğlubiyyətdən xilas olmaq istəyi artan qonaqlar çox çalışsalar da, istəklərinə çata bilmədilər. Cəmi 5 dəqiqə sonra növbəti topu tordan çıxarmalı oldular. Oyuna sonradan qoşulan “Turan Tovuz”un yeni transferi Souzanın məhsuldar ötürməsini Paçu boşa vermədi - 3:1. Oyun bu hesabla da yekunlaşdı. Beləliklə, Abbasovun komandası qələbə sayəsində “Sabah”ı geridə qoymaqla yanaşı, “Səbail”lə aradakı xal fərqini də 2-yə endirdi.

Gözdən qaçmadı
* “Səbail” azarkeşləri Tovuza yollanmağı lazım bilməmişdi.
* Komandalardan heç birinin kapitanı sona qədər meydanda qalmadı.

KAMAL SƏFƏR