“Sabah”ın Murad Musayevin istefasından sonrakı ilk oyunda necə təsir bağışlayacağını hər kəs maraqla gözləyirdi.

Çünki son kubok oyununda elə bu stadionda “Qarabağ”a böyükhesablı məğlubiyyət (1:7) komandanın yaxşı vəziyyətdə olmadığını göstərmişdi. Təcrübəli çalışdırıcının qəfil istefasından sonra komandanı oyuna İqor Ponomaryov hazırlamışdı. Onun yardımçıları isə Ruslan Qafitullin, Vitali Kovalyov və Rəşad Eyyubov idi.

Matçı maraqlı edən digər məqam rəqibin aradakı 1 xal fərqini əritməyə iddialı “Turan Tovuz” olması idi. Nə isə, söhbəti uzatmadan keçək oyuna. İlk dəqiqələrdən etibarən tərəflərin top uğrunda qarşlıqlı mübarizəsinin şahidi olduq. “Tələbələr” heç də rəqibdən geri qalmırdı. Hətta ilk təhlükəli vəziyyəti yaratmağa da yaxın oldular. Parrisin zərbəsi həm zəif, həm də qeyri-dəqiq oldu. Artıq 11-ci dəqiqədə qonaqlar hesabı açıldı. Ayxanın ötürməsindən sonra tovuzluların yeni transferi Souza topu Yusif İmanovun ayaqları arasından tora göndərdi – 0:1. Hesabın açılması mübarizənin daha da kəskinləşməsinə səbəb oldu. 15-ci dəqiqədə Nuriyevin qüvvətli zərbəsini Aydın dəf edərək kornerə göndərdi. Hücumların sayını artıran “bayquşlar” 23-cü dəqiqəsində istəyinə çatdı. Nuriyevin standart vəziyyətdən qapı qarşısına ötürməsini Parris maksimum dəyərləndirdi – 1:1. Qoldan ruhlanan meydan sahibləri üstünlüyünü davam etdirdi. Lakin “bozqurdlar”ın əks-hücumlarından ehtiyatlanaraq, böyük qüvvə ilə hücuma çıxmaq istəmirdilər. 30-cu dəqiqədə Souza yenidən komandasını önə keçirmək istədi. Bu dəfə onun qüvvətli zərbəsi ətdən divar hörmüş müdafiəçilərdən qayıtdı. 5 dəqiqə sonra Til standart vəziyyətdən topu birbaşa qapıya göndərsə də, qolkiper sayıqlığı itirmədi. İlk hissənin sonuncu dəqiqəsində Marqarita künc zərbəsindən sonra tovuzluluların uzaqlaşdırdığı topu elə havada ikən qüvvətli zərbəylə “çərçivə”yə yolladı. Lakin Aydın Bayramov gözəl seyvlə yadda qaldı.
İkinci hissəyə meydan sahibləri çox yaxşı başladı. Ancaq bu fəallıq uzun sürmədi. Hər iki tərəfin kifayət qədər yorğun olduğu açıq-aydın görünürdü. Demək olar ki, bu hissədə heç bir real qol vəziyyəti yaranmadı. Oyun da elə bu hesabla da bitdi – 1:1. Beləliklə, Musayevsiz “Sabah” ilk oyunda 1 xalla kifayətləndi və iki pillə irəlilədi.

Gözdən qaçmadı
* Kamal Bayramovla və Fərid Yusifli oyunu VİP sektordan izləyirdi. Kamal hətta komanda yoldaşlarına göstərişlər də verirdi (“İsmayıl, yaxşıdı”, “Şəhriyar, komandanı sakitləşdir”), bir növ burda da kapitanlığı davam etdirirdi. Yan xətt hakiminin əllə oyuna görə bayrağı qaldırmasına Kamal “o biri hakim ordan görmür, sən burdan necə görürsən”, – deyə reaksiya verdi. Hətta bir epziodda matçın baş hakiminə: “İnqilab, bəlkə kart göstərəsən” dedi.
* 43-cü dəqiqədə Marandiçinin qüvvətli zərbə ilə uzaqlaşdırdığı top stadiondan da çıxdı.

KAMAL SƏFƏR