Turnir cədvəlinin üst pillələrində qərarlaşan rəqiblər meydana 2-ci yer uğrunda mübarizə üçün çıxmışdı.

“Sumqayıt” qələbə qazanaraq, yerini qorumaq, “Zirə” isə “gənclik şəhəri” təmsilçisi ilə xallarını bərabərləşdirmək niyyətindəydi. Turun mərkəzi oyununa azarkeş marağı aşağı səviyyədə idi. Tribunaların yarısı dolardı, ya dolmazdı. Meydan sahiblərindən “Qartallar”, qonaqlardan isə “Kimyaçılar” fanklubu öz yerlərində idi.

Oyun qarşılıqlı hücumlarla başladı. İlk təhlükəli hücum qonaqlardan gəldi. 8-ci dəqiqənin tamamında Muradovun başla zərbəsi qapıdan aralı keçdi. Həmin epizodun davamında Renato öz cərimə meydançasında əllə oynadı. Baş hakim epizodu aydın görürdü və VAR-dan xəbərdarlıq almadan penalti təyin etdi. 11 metrlik cərimə zərbəsində topun arxasına “Sumqayıt”ın bu istiqamətdə ixtisaslaşan oyunçusu Muradov keçdi. Lakin onun bərbad zərbəsini Silva küncə çıxarmağı bacardı. Həmin künc zərbəsi də təhlükəli alındı. Kehat topu başla qapıya göndərsə də, öncə Silva, ardından Renato etibarlı oynadı. 13-cü dəqiqədə isə qonaqlar istəyinə çatdı. Komandanın kapitanı Bədəlov fərqləndi. Lakin referi epizodu oyundankənar vəziyyət kimi qiymətləndirib qolu ləğv etdi. “Zirə” isə hissənin ortalarında özünə gəldi. 31-ci dəqiqədə Nuriyev baxımlı hərəkətlə rəqib müdafiəçiləri geridə qoyaraq, qapıya zərbə endirdi. Lakin Cənnətov çətinliklə də olsa, topu dəf etməyi bacardı. 41-ci dəqiqədə isə Nuriyev komandasına penalti qazandırdı. Onun cərimə zərbəsindən vurduğu top Xaçayevin əlinə dəydi. 11 metrlik cərimə zərbəsini Alıyev yerinə yetirdi. “Zirə”nin kapitanının zərbəsində də dəqiqlik çatmadı. O, topu qapıdan aralı vurdu.

İkinci hissə də eyni ssenari ilə başladı. Ninqanın ön xətdə fəallığı bir neçə epizodda özünü göstərdi. O, 50-ci dəqiqədə rəqib futbolçuları geridə qoyaraq, qapıya zərbə endirsə də, qolkiper yerində idi. 52-ci dəqiqədə Utziq cərimə meydançasına girərək, iti bucaq altından zərbə endirdi. Lakin dəqiq ola bilmədi. 77-ci dəqiqədə isə qonaqlar real qol vəziyyəti yaratdı. Kehatın qayçıvari zərbəsini Silva küncə çıxardı. Meydan sahiblərinin buna cavabı gecikmədi. İlkin Muradovun cinah asmasını Utziq tamamlasa da, “çərçivə”yə düşə bilmədi. Sonda tərəflər hərəyə 1 xala razılaşdı – 0:0. Bununla da xalını 35-ə çatdıran “Sumqayıt” 2-ci pillədəki yerini qorudu. “Zirə” isə 32 xalla 4-cü pillədə qərarlaşıb.

Gözdən qaçmadı
* Matçı izləyənlər arasında yığmanın məşqçisi Arif Əsədov də var idi.
* “Kimyaçılar” stadiona girərkən mühafizə işçiləri ilə problem yaşadı. Onlar üstlərinin yoxlanılmasına etiraz edirdi.
* “Zirə” fanatları və komandanın çalışdırıcısı Rəşad Sadıqov hakimə kəskin etiraz bildirirdi.

İSMAYIL XEYRULLAYEV