Fevralın 21-də Çempionlar Liqasının (ÇL) 1/8 finalının ilk oyunlarına yekun vuruldu.

"Football-plus.az" xəbər verir ki, Portuda keçirilən matçda eyniadlı komanda “Arsenal”a minimal hesabla qalib gəldi. “Napoli” – “Barselona” oyunu isə 1:1 hesabıyla nəticələndi. Bu cütlərdə cavab görüşləri martın 12-nə təyin olunub.

Portu - Arsenal 1:0 (0:0)
Portu (Portuqaliya): Koşta, Joao Mario, Pepe, Otavio, Vendell (Euştakio, 90), Varela, Niko (Xayme, 81), Konseysao (Borjeş, 85), Pepe Akino, Qaleno, Evanilson (Martines, 85).
Arsenal (London, İngiltərə): Raya, Uayt, Saliba, Qabriel, Kivyor, Rays, Edeqor, Haverts, Saka, Trossar (Juninyo, 74), Martinelli.
Qol: Qaleno, 90+4.
Vərəqə: Rays, 2. Konseysao, 52. Kivyor, 57. Haverts, 61. Niko, 62 – sarı.
Hakim: Sərdar Gözübüyük (Niderland).
21 fevral. Portu. 49111 tamaşaçı.
oyunun statistikası
6 (2) qapıya (“çərçivə”yə) zərbə 7 (0)
1 künc zərbəsi 10
0 ofsayd 0
14 qayda pozuntusu 22
2 (0) sarı (qırmızı) vərəqə 3 (0)
38 topa sahibolma (faizlə) 62

ÇL-də 2016/17 mövsümündən sonra ilk dəfə pley-offa vəsiqə qazanan “Arsenal” üçün statistika heç də ürəkaçan deyildi. İngiltərə klubu 1/8 finalın ilk oyunu çərçivəsində keçirdiyi əvvəlki 6 matçda məğlub olmuşdu. Londonluların son 7 halda bu mərhələni adlaya bilməməsi də diqqətdən yayınmayan faktdı. Onların çərçənbə gününə qədər “Portu” ilə keçirdiyi 3 oyunda qələbə üzü görmədiyini (1 heç-heçə, 2 məğlubiyyət) də qeyd edək. Bu da maraqlı idi ki, Portuqaliya klubu İngiltərə təmsilçiləri ilə keçirdiyi əvvəlki 5 matçda qalib gələ bilməmişdi (1 heç-heçə, 4 məğlubiyyət).
Fevralın 21-də “Portu”nun yox, “Arsenal”ın uğursuz seriyası davam etdi. Halbuki Milel Artetanın komandası topa daha çox sahib oldu. Buna baxmayaraq, bu plandakı üstünlüyündən heç cür yararlana bilmədi. Londonluların qapı istiqamətində endirdiyi 7 zərbəsindən heç birinin dəqiq alınmadığını qeyd edək. Olduqca “dişsiz” görünən qonaq komanda Koştanın qoruduğu qapı qarşısında real qol vəziyyəti yarada bilmədi. Meydan sahibləri premyer-liqada qol vurmaqda əsla çətinlik çəkməyən rəqibin hücum potensialını zərərsizləşdirməyin yolunu yaxşı tapmışdılar. Gözlənildiyi kimi, Serjio Konseysaonun çalışdırdğı komanda ilk növbədə qapısının toxunulmazlığını təmin etməyə çalışırdı. Buna nail olan portuluların oyunçusu Qaleno ilk hissədə dirəyi nişan aldı. Braziliyalı yarımmüdafiəçi qaçırdığı imkanın əvəzini son saniyələrdə çıxdı: onun uzaqdan endirdiyi zərbə “Arsenal”ın pley-off sindromunu davam etdirdi.

Faktlar
* “Arsenal”ın 5 oyunluq qələbə seriyası qırıldı. Komanda bu il ilk dəfə yanvarın 7-də İngiltərə kuboku oyununda “Liverpul”a məğlub olmuşdu.
* “Arsenal” ÇL-in pley-offunda ardıcıl 5-ci məğlubiyyətini aldı. İngiltərə klubu 2016/17 mövsümünün 1/8 finalında “Bavariya”ya (1:5, 1:5), 2015/16 mövsümünün eyni mərhələsində isə “Barselona”ya (0:2, 1:3) uduzmuşdu.
* Pepe ÇL-in tarixinə ən yaşlı sahə oyunçusu kimi düşdü. “Portu”nun müdafiəçisi fevralın 21-də meydana 40 yaş 360 günlüyündə çıxdı. Maraq üçün fevralın 26-da onun 41 yaşının tamam olacağını qeyd edək. Turnirin ən yaşlı oyunçusu isə Marko Ballottadı. “Latsio”nun sabiq qapıçısı 2007-ci ilin dekabrında “Real”a qarşı 43 yaş 262 günlüyündə oynayıb.

Oyundan sonra
Serjio Konseysao, “Portu”nun baş məşqçisi: “Oyunçular gördükləri işdən razı qalmalıdılar. Onlar əvəldən axıra qədər hədəfə köklənmişdilər. Rəqibə mane olmaq üçün hansı mövqeləri tutmalı olduqlarını və hücumda effektli olmaq üçün necə oynamaq lazım gəldiyini yaxşı bilirdilər. Əsl Çempionlar Liqası matçının şahidi olduq. Rəqib topa daha çox nəzarət etdi, amma “Portu” daha təhlükəli idi. Biz cinahlarda çox fəal oynadıq. Həm də rəqibin meydanın mərkəzində istədiyi oyunu sərgiləməsinə imkan vermədik. Oyunla bağlı planımızı böyük ölçüdə yerinə yetirdik, hətta standart vəziyyətlər üzrə hazırladığımız plan da baş tutdu. Buna görə futbolçularımızı təbrik edirəm”.

Mikel Arteta, “Arsenal”ın baş məşqçisi: “Son anda buraxılan qolla uduzduğumuza görə çox məyusam. Həmin epizodda o qədər də yaxşı oynamadıq. Çempionlar Liqasında belə halda səni sərt cəzalandırırlar. Qalib gələ bilmirsənsə, heç olmasa uduzma. Meydanda dominantlıq etdik, lakin xüsusilə ilk hissədə hədəfə doğru real addım atmaqda çətinlik çəkdik. Daha çox aqressiv olmalı, rəqibin müdafiə xətlərini yarmalı, irəlidə daha təhlükəli və effektli oynamalı idik. Bu baxımdan ikinci hissədə daha yaxşı təsir bağışladıq. Qapı qarşısında kifayət qədər şansımız oldu. Ancaq heç birindən yararlana bilmədik. Topu üç dəfə qapının qarşısında rəqibə verməklə qələbə qazana bilməzdik. 1/4 finala çıxmaq istəyirsənsə, rəqibi məğlub etməlisən. “Emireyts”də bunu bacarmalıyıq. Biz daha yaxşı oynaya bilərik. “Portu” arxa xətdə yaxşı təşkilatlanmış komandadı. Bu komanda daim rəqibin oyun ritmini korlamaqla məşğuldu. Rəqibdən kiməsə toxunmağa belə çəkinirdik. Ona görə ki, ən kiçik təmasda belə cərimə zərbəsi təyin olunurdu. Bu oyundan yaxşı dərs alacaq, cavab görüşünə lazımi qaydada hazırlaşacaq və istəyimizə çatacağıq”.