B qrupu
Arsenal – PSV 4:0 (3:0)
Arsenal (London, İngiltərə): Rayya, Uayt, Saliba, Qabriel, Zinçenko (Tomiyasu, 58), Edeqor, Rays (Jorjinyo, 76), Haverts, Saka (Vieyra, 69), Jezus (Smit-Rou, 69), Trossar (Nelson, 58).
PSV (Eyndoven, Niderland): Benites, Teze, Bella-Koçap (Ramalyo, 76), Boskalyi, Dest, Shauten, Derman, Saibari (Tillman, 66), Bakayoko (Losano, 66), De Yonq (Pepi, 90), Lans (Fertesen, 77).
Qollar: Saka, 8 (1:0). Trossar, 20 (2:0). Jezus, 38 (3:0). Edeqor, 70 (4:0).
Vərəqələr: Uayt. 43. Boskalyi, 48. Tillman, 80. Shauten, 87 – sarı.
Hakim: Feliks Svayer (Almaniya).
20 sentyabr. London. 58360 tamaşaçı.
oyunun statistikası
18 (8) qapıya (“çərçivə”yə) zərbə 11 (4)
4 künc zərbəsi 4
3 ofsayd 1
8 qayda pozuntusu 8
1 (0) sarı (qırmızı) vərəqə 3 (0)
60 topa sahibolma (faizlə) 40

“Arsenal” ÇL üçün darıxmışdı. Vengerin vaxtında bu turnirdə oynamaq komanda üçün adi iş idisə, sonradan uzunmüddətli fasilə yarandı. Artetanın uğurlu ötən mövsümü “topçular”ı qitənin əsas turnirinə qaytardı. Və komanda dönüşünü parlaq qələbə ilə qeyd etdi.

“Arsenal” Şimali London derbisi ərəfəsində azarkeşlərinə müsbət emosiyalar bəxş etməliydi. Niderland çempionatında liderlik edən rəqibdən isə daha ciddi müqavimət gözlənilirdi. Ancaq elə ilk yarıda oyunun taleyi həll olundu. Əvvəlcə Saka qapıçıdan dönən topa çatdı, ardından Trossar ustalıqla ötürməu qapadı, 3-cü topu isə Jezus vurdu. Yəni fasiləyə qədər oyunda heç bir intriqa qalmadı. İmkan olsaydı, heç kim 2-ci hissədə meydana çıxmaq istəməzdi. PSV anlayırdı ki, belə oynayan “Arsenal”la görüşdə geridönüş etmək mümkünsüzdü. “Topçular” 2-ci hissədə qolları sıralamağa o qədər də həvəs göstərmədi. Hər halda, meydan sahibləri daha bir qol vurdu. Edeqor bu qolu haqq etmişdi. Beləliklə, “Arsenal” 7 illik fasilədən sonra ÇL-in qrup turnirinə böyükhesablı qələbə ilə döndü. Ancaq tablodakı rəqəmlərlə yanaşı, azarkeşləri komandanın parlaq oyunu da sevindirir.

Sevilya – Lans 1:1 (1:1)
Sevilya: Dmitroviç, X.Sançes (Navas, 80), Qudel, Ramos, Pedrosa, Fernando, Sou (Sumare, 63), Lamela (Lukebakio, 63), Rakitiç (Suso, 74), Okampos, Ən-Nəsiri (Dias, 80).
Lans: Samba, Qradit, Danso, Medina, Frankovski, Əbdül Səməd, Mendi (Diuf, 71), Maşado (Haydara, 85), Sotoka, Füljini (Tomasson, 76), Vahi (Gilavoqi, 71).
Qollar: Okampos, 9 (1:0). Füljini, 24 (1:1).
Vərəqələr: Medina, 14. Sotoka, 17. Samba, 18. Füljini, 30. Qudel, 37. Ramos, 70. Okampos, 73. Haydara, 90 – sarı.
Hakim: Tobias Ştiler (Almaniya).
20 sentyabr. Sevilya. 33544 tamaşaçı.
oyunun statistikası
11 (6) qapıya (“çərçivə”yə) zərbə 11 (3)
9 künc zərbəsi 6
2 ofsayd 2
18 qayda pozuntusu 16
3 (0) sarı (qırmızı) vərəqə 5 (0)
55 topa sahibolma (faizlə) 45

Həm “Sevilya”, həm də “Lans” mövsümün əvvəlini boşa verib. La Liqanın ilk üç oyununda uduzan, “yolüstü” Superkuboku da “Mançester Siti”yə verən İspaniya klubu ötən həftəsonu, nəhayət, evdə “Las-Palmas”ı məğlub edə bilmişdi. “Lans” isə cari mövsümdə, ümumiyyətlə, qələbənin nə olduğunu bilmir. Çempionatın ilk 5 oyununda yalnız 1 xal toplayan “qan-qızılılar” turnir cədvəlinin zirzəmisindədi. Son iki oyunda “quru” hesabla uduzan komandanın azarkeşləri ÇL-in startı ərəfəsində nikbinlik üçün heç bir əsas tapa bilmirdi. Lap “Sevilya” müəyyən kadr problemləri yaşasa da. Ümumiyyətlə, bu qrupda pley-offa vəsiqə uğrunsa istənilən komanda mübarizə apara bilər. Baxmayaraq ki, “Arsenal” başqalarıyla müqayisədə favoritdi. Yeri gəlmişkən, “Sevilya” ilə “Lans” indiyə qədər rəsmi oyunlarda qarşılaşmamışdı. “Lans” ÇL-in qrup mərhələsində sonuncu dəfə 20 il əvvəl oynamışdısa, “Sevilya” avrokubokların daimi-təcrübəli iştirakçısıdı. Bu üzdən qonaqlar maksimum heç-heçəyə ümid edirdi, ancaq “Sevilya” meydana ancaq qələbə üçün çıxmışdı.

...Oyun qonaqlar üçün pis başladı. Artıq 9-cu dəqiqədə künc zərbəsindən ötürməni başının arxası ilə qapıya göndərən Okampos hesabı açdı. Ancaq qonaqlar çox tez özünə gələrək hissənin ortasında hesabı bərabərləşdirdilər. Füljini cərimə zərbəsini möhtəşəm yerinə yetirdi – top düz sağ “9-luğ”a getdi. Okampos fasiləyə qədər dubl edə bilərdi, sadəcə, Samba qonaqları xilas etdi. Fasilədən sonra da oyunun axarı dəyişmədi. Oyun yenə də qarşılılıq hücumlar şəraitində keçirdi. Düzdü, “Sevilya” müəyyən üstünlüyə malik idi. Komandalar çoxlu standart vəziyyət qazandı, referi Ştiler isə sarı vərəqələri sağa-sola payladı. Məşqçilər də oyunun axarına müdaxilə etməyə çalışdı. Meydan sahiblərinin heyətində Lukebakio oyuna yaxşı qoşuldu. Belçikalı hücumçu üç təhlükəli zərbə vursa da, fərqlənə bilmədi. Sona qədər azarkeşləri gərginlikdə saxalayan oyunda başqa qol olmadı. Düzünə qalsa, komandalardan heç biri məğlubiyyəti haqq etmirdi. Bu qrupda, demək olar ki, heç nə aydın deyil. Yalnız “Arsenal” startda favorit statusunu doğrultdi. Qalan üç komanda isə 2-ci yer uğrunda mübarizə aparmağa qadirdi.

3 oktyabr: Lans – Arsenal, PSV – Sevilya.

Oyundan sonra...
Mikel Arteta, “Arsenal”ın baş məşqçisi: “Məmnun oldum. İlk dəqiqələrdən irəli atıldıq. Həqiqətən də, hər iki cərimə meydançasında gözəl oynadıq, Çempionlar Liqasında nəyəsə iddia etmək istəyirsənsə, bu vacib şərtdi. Bu gecənin dadını çıxarmaq istəyirəm. Evə dönəndən sonra xanımımla gec axşam yeməyi təşkil edəcəm. Bu qələbənin ləzzətini yaşayandan sonra sabahdan “Tottenhem”ə köklənəcəm, çünki irəlidə bizi vacib oyun gözləyir”.

Lük de Yonq, PSV-nin hücumçusu: “Güclü rəqiblə qarşılaşacağımızı bilirdik. “Arsenal”a təzyiq göstərməyə çalışsaq da, oyunun lap əvvəlində iki qol buraxdıq. Bundan sonra oyuna nəzarəti yaxşılaşdırmağı bacarsaq da, rəqib üçüncü qolu vurdu. Elə onda oyunun bizim üçün bitdiyi aydınlaşdı”.