Gözlənildiyi kimi də oldu: “Barselona” “Antverp”lə ev oyununda heç bir problem yaşamadı.

“Football-plus.az” xəbər verir ki, qrup mərhələsinə darmadağınla başlayan Xavinin komandası rəqib qapısından daha çox top keçirə bilərdi. Yalnız oyunun əvvəlində belçikalılar müəyyən dərəcədə müqavimət göstərdi, ancaq kataloniyalılar təzyiqi artıran kimi müdafiə xətti çökdü. 11-ci dəqiqədə hesabı açan Feliş az sonra Levandovskiyə də assistentlik etdi. Qonaqlar 3-cü qolu özləri vurdular – Rafinyanın ötürməsindən sonra Batayenin dirsəyinə dəyən top tora düşdü. Faktiki oyunun taleyi həll olundu və meydan sahibləri bir qədər sakitləşdilər. Ancaq fasilədən sonra “maşın yenə işə düşdü”. 54-cü dəqiqədə Qavi yaxın “9-luğ”u nişan almaqla fərqi artırdı. Bir müddət sonra isə qarşısıalınmaz Feliş dublunu rəsmiləşdirdi. Ümumiyyətlə, portuqaliyalı “Barselona”ya keçəndən sonra “2-ci nəfəsi açılıb”. Feliş 2-ci qolu vurandan sonra Xavi onu Yamalla əvəzlədi. Yeniyetmə istedad da adını tabloya yazdıra bilərdi, sadəcə, iti bucaq altından boş qapıya düşə bilmədi. Levandovski də dubl etməyə yaxın idi. “Antverp” isə praktiki cəhətdən heç nə ilə yadda qalmadı. Ter Ştegen bir neçə dəfə oyuna qoşulmalı oldu. Son 4 gündə iki dəfə 5:0 hesabıyla qələbə qazanan “Barselona” qrupda liderliyi ələ keçirdi. Xavinin komandası bu qrupda aşkar favoritdi. Belçika komandası isə “Portu” və “Şaxtyor” ilə oyunlarda xal toplamağa çalışmalıdı.

Belə görünür ki, H qrupunda hadisələr planlaşdırılan ssenari üzrə cərəyan edəcək. “Barselona” 1-ci, “Antverp” sonuncu olacaq. “Şaxtyor” bəlkə də belçikalıları qabaqlayacaq, ancaq “Portu” ilə duellərdə şansı yoxdu. Portuqaliya komandası hesabat oyununda rəqibdən daha inamlı idi və əlindən gələni etdi ki, “Şaxtyor”un heyətində qapıçı daha çox gözə dəysin. 2-ci hissə açıq-aşkar maraqsız və “boz” alındı. İlk növbədə ona görə ki, Serjio Konseysaonun komandası oyunun taleyini fasiləyə qədər həll etdi. Qaleno dubl etdi - əvvəlcə qapıçı Riznıkın qaytardığı topu tora göndərdi, ardından müdafiəçilərin kobud səhvindən sonra təkbətək çıxdı. Üstəlik braziliyalı Taremiyə məhsuldar ötürmə verməklə oyunun əsas qəhrəmanı olduğunu sübut etdi. “Şaxtyor” ən azı 1 xal qazanmağa qadir olduğuna 13-cü dəqiqədə - Kelsi baş zərbəsi ilə hesabı bərabərləşdirəndə inandı. Ancaq tablodakı bərabərlik hesabı qısa müddət qorundu. Beləcə “şaxtaçılar”ın “Portu” ilə duellərdə qələbəsiz oyunlar seriyası artaraq 7-yə çatdı.

H qrupu
Barselona – Antverp 5:0 (3:0)
Barselona (İspaniya): Ter Ştegen, Kanselo (Roberto, 76), Kunde, Kristensen, Balde, De Yonq (Romeu, 58), Gündoğan, Qavi (Lopes, 58), Rafinya (Torres, 68), Levandovski, Feliş (Yamal, 68).
Antverp (Antverpen, Belçika): Byute, Bataye (Kerk, 73), Alderveyreld, Kulibali, Veyndal, Vermeeren, Keyta, Muyya (Valensiya, 83), Ekkelenkamp (Yusuf, 60), Balikvişa (De Lat, 60), Yanssen (İlenihena, 60).
Qollar: Feliş, 11 (1:0). Levandovski, 19 (2:0). Bataye, 22-öz qapısına (3:0). Qavi, 54 (4:0). Feliş, 66 (5:0).
Vərəqə: Qavi, 36 – sarı.
Hakim: Radu Petresku (Rumıniya).
19 sentyabr. Barselona. 40989 tamaşaçı.
oyunun statistikası
22 (9) qapıya (“çərçivə”yə) zərbə 3 (1)
10 künc zərbəsi 2
1 ofsayd 1
10 qayda pozuntusu 8
1 (0) sarı (qırmızı) vərəqə 0 (0)
65 topa sahibolma (faizlə) 35
Şaxtyor – Portu 1:3 (1:3)
Şaxtyor (Donetsk, Ukrayna): Riznık, Konoplya (Qoçoleişvili, 76), Lemkin (Azarov, 65), Rakitski, Miroşi, Stepanenko (Bondarenko, 65), Nazarina, Sudakov, Zubkov, Kelsi (Kaşuk, 65), Sikan (Yeqinaldo, 81).
Portu (Portuqaliya): D.Koşta, Mario (X.Sançes, 73), Pepe, Karmu, Sanusi (Vendell, 46), Varela, Euştakio, Franko (Borjeş, 82), Xayme (Niko, 73), Qaleno (Konseysao, 90+1), Taremi.
Qollar: Qaleno, 8 (0:1). Kelsi, 13 (1:1). Qaleno, 15 (1:2). Taremi, 29 (1:3).
Vərəqələr: Karmu, 4. Sikan, 6. Stepanenko, 31. Mario, 54. Konoplya, 76 – sarı.
Hakim: Davide Massa (İtaliya).
19 sentyabr. Hamburq. 46729 tamaşaçı.
oyunun statistikası
9 (4) qapıya (“çərçivə”yə) zərbə 13 (9)
4 künc zərbəsi 3
1 ofsayd 0
14 qayda pozuntusu 8
3 (0) sarı (qırmızı) vərəqə 2 (0)
49 topa sahibolma (faizlə) 51
4 oktyabr: Antverp – Şaxtyor, Portu – Barselona.