“Köhlən atlar”ın tarix yazması üçün əla şans yaranmışdı.

“Qarabağ” avrokuboklarda qrup mərhələsində ilk oyununda qələbə qazanmışdı. İkinci görüşdə də bunu təkrarlamaq olardı. Lakin rəqiblə ilk dəfə qarşılaşırdıq. Heyətdə zədəlilərin olması da əlavə problem idi. Mustafazadə, Veşoviç və Cicanın yoxluğu ilk dəqiqələrdən hiss olunurdu. İsveçlilər müdafiə xəttində olduqca ehtiyatlı idi.

Ağdamlılar ilk dəqiqələrdən hücuma atıldı. Artıq 8-ci dəqiqədə qola yaxın olduq. Künc zərbəsindən ötürülən topu Juninyo başla qapıya göndərmək istəsə də, “dəri kürə” qapının üstündən keçdi. 12-ci dəqiqədə Romao cərimə meydanında xəttin üzərində qaydanı pozdu. Referi qayda pozuntusunu qeydə alsa da, penalti təyin etmədi. Riqaardın zərbəsi qapı tirinə dəyərək çölə çıxdı. 15-ci dəqiqədə isə sağ cinahdan ötürülən topu Çifulya başla qapıya göndərsə də, Lunyov yerində idi.

Bundan sonra ağdamlılar oyuna nəzarəti ələ keçirdi. 20-ci dəqiqədə Benzyanın zərbəsi qapının üstündən keçdi. Daha çox mərkəzdən hücumlar qurmağa çalışan Qurbanovun komandası müdafiəni yarmaqda çətinlik çəkirdi. Andrade ilə Zubir isveçlilərə qarşı mübarizədə sönük görünürdü. Lakin topa hələ də ağdamlılar nəzarət edirdi.

32-ci dəqiqə Leandro bir qədər irəlilədikdən sonra qapıya zərbə endirsə də, müdafiəçiyə dəyən top çölə çıxdı. Benzyanın künc zərbəsindən ötürdüyü topu Mateus qapının üstündən vurdu. İlk hissənin son dəqiqələri də komandamızın üstünlüyü şəraitində keçsə də, hesab açılmadı.

Fasilədə baş məşqçilər hansısa dəyişiklik etmədi. 2-ci hissənin əvvəlində də ağdamlılar üstün idi. Ardıcıl epizodlarda Juninyo və Andrade qola yaxın oldu. Braziliyalının başla zərbəsinin qarşısını müdafiəçilər aldı. Andradenin epizodunda isə qolkiper etibarlı oynadı. Zaman keçdikcə “Qarabağ”ın təzyiqi daha da artırdı. Artıq qolun vaxtı yetişmişdi. 67-ci dəqiqədə Yankoviçin zərbəsi az fərqlə qapının yanından keçdi. “Həkken” oyunun alınmadığını görərək əks-hücumlar qurmağa çalışırdı.

69-cu dəqiqədə Çifulya sol cinahdan ötürülən topu qapıya göndərmək istədi. Lakin onun zərbəsində azacıq dəqiqlik çatmadı. Bu epizodda Lunyovun çıxışda səhvə yol verməsi də gözdən qaçmadı. Cəmi 1 dəqiqə sonra ağdamlılar hesabı açdı. Benzyanın möhtəşəm ötürməsini qəbul edən Juninyo bir hərəkətlə rəqib müdafiəçidən qurtuldu və qapının küncünə qarşısıalınmaz zərbə vurdu.

Qoldan dərhal sonra meydan sahibləri hücuma atıldı. “Qarabağ” isə müdafiədə etibarlı oynayaraq əks-hücumlar qurmaq niyyətində idi. Komandaların bütün cəhdlərinə baxmayaraq, başqa qol vurulmadı. Beləliklə, “Qarabağ” qrupunda ardıcıl 2-ci qələbə ilə pley-off yolunda önəmli addım atdı. İndi ağdamlılar son iki oyun ərəfəsində daha yaxşı durumda olmaq üçün “Bayer-04”dən xal almağa çalışmalıdı.

Gözdən qaçmadı
* Oyunu izləyənlər arasında 1000-ə yaxın azərbaycanlı var idi. “Hünər Group”in rəhbəri və təsisçisi Ehtiram Quliyev də azarkeşlər arasındaydı.
* “Qarabağ” qol vurarkən efir rejissoru Elvin Cəfərquliyevi göstərdi. Millimizin üzvü daha çox sevindiyindən operatorları çaşdırdı.
* Oyun bitəndən sonra “Qarabağ”ın çalışdırıcısı Qurban Qurbanov azarkeşlərlə görüşdü.

İLKİN SULTANLI