Türkiyə mətbuatında ''Fənərbaxça''nın sabiq baş məşqçisi Jorje Jezuşla bağlı ortaya maraqlı iddia atılıb.

"Football-plus.az" xəbər verir ki, təcrübəli portuqaliyalı mütəxəssis 1 il İstanbul nəhəngində işlədikdən sonra bu yay Səudiyyə Ərəbistanı təmsilçisi ''Əl-Hilal''ın başına keçdi.

Şaiyələrə inansaq, ''Fənər'' ötən mövsüm Türkiyə kubokundakı zəfərə görə Jezuşa ödənilməli olan bonusu hələ də ödəməyib. Xəbərin detallarında qeyd olunub ki, Jezuş problemi klubun özü ilə həll etmək istəyirmiş. Ötən həftə 69 yaşlı məşqçi kluba sonuncu dəfə xəbərdarlıq etmək niyyətində olsa da, heç kimlə əlaqə saxlaya bilməyib. Bu üzdən çarəni FİFA-ya şikayət etməkdə görüb! Bunun uydurma xəbərləri sevən Türkiyə mətbuatının növbəti uydurması olması ehtimalı yüksəkdi. Çünki Jezuşla ''Fənər'' rəhbərliyi dost şəkildə yollarını ayırdı. Üstəlik Türkiyə kubokundakı qələbənin bonusu o dərəcədə böyük məbləğ deyil ki, ''Fənər''in onu ödəməyə gücü çatmasın.

Xatırladaq ki, ''sarı-lacivərdlilər'' ötən mövsüm Jezuşun başçılığı altında Türkiyə çempionatını 2-ci pillədə başa vurdular. Ölkə kubokunun finalında isə komanda ''İstanbul BŞ''ni 2:0 yenərək tarixində 7-ci dəfə bu titula sahib çıxdı.

ƏLİ