Basketbol üzrə Türkiyə çempionatının pley-offunda yarımfinal mərhələsi keçirilir.

"Footbll-plus.az" xəbər verir ki, ''Fənərbaxça'' - ''Darüşşafaka'' duelinde hesab 1:1-di. Digər duel isə gözlənilməz nəticə ilə start götürdü. Dünən ''Qalatasaray'' səfərdə ''Anadolu Efes''i 105:70 hesabı ilə darmadağın etdi! ''Anadolu Efes''in 1 həftə öncə finalda ''Real''ı məğlub edərək ardıcıl ikinci il Avroliqanın qalibi olduğunu nəzərə alsaq, bu nəticəni sürpriz adlandırmaq olar. Görünür, Ərgin Atamanın komandası hələ də eyforiyadan ayılmayıb. ''Qalatasaray''ın üçsaylıq atışlarda böyük üstünlüyü diqqət çəkdi. Bu komandanın oyun ərzində 37 üçsaylıq atışından 18-i dəqiq oldusa, rəqibdə 29 belə atışın cəmi 7-si səbətə düşdü. Bu dueldə ikinci oyun mayın 29-da yenə ''Anadolu Efes''in meydanında keçiriləcək. Məşqçi dəyişikliyindən sonra ''Qalatasaray''dakı yüksəliş diqqət çəkir. İstanbul nəhəngi martın ortalarında Əkrəm Məmnunla yollarını ayıraraq Andreas Pistiolisi baş məşqçi postuna gətirmişdi.

Komanda yunan mütəxəssisin başçılığı altında keçirdiyi 10 oyunun hamısından qələbəylə ayrılıb.