“Oyundan öncə hər iki komandanın böyük problemlər olduğunu demişdim. Son oyunlardakı nəticələr də bunu deməyə əsas verirdi. Oyun zamanı da hər iki tərəfin müdafiədə sıxıntılar yaşadığı açıq-aşkar bəlli idi. Hücum xətti isə müdafiənin əksinə, çox güclü idi. “Braqa” bu gücü oyuna yansıda bilmədi, amma “Qarabağ” bunu bacardı. “Qarabağ” oyuna yüksək pressinqlə başlayaraq, rəqibi öz cərimə meydançası daxilində səhv etməyə məcbur etdi və bunun sayəsində də penalti qazandı. Sadəcə, penaltidən sonra topu özündə saxlamağa çətinlik çəkdi. Bizim çatışmayan cəhətimiz bir də o idi ki, arxadan oyun qurarkən 2-3-cü toplarımız ancaq rəqibə gedirdi. Bunun da məntiqi sonluğu kimi rəqib hissənin sonunda hesabı bərbərləşdirdi. Demək olar ki, penaltidən sonra oyunumuz heç də ürəkaçan deyildi. Sadəcə topu hara gəldi vurur, rəqibin təzyiqindən çıxmağa çalışırdıq. Amma “Braqa”nın 2-ci yarıda açıq-aşkar öndə oynaması matçın axarını dəyişən amil oldu. İkinci hissədə Romao ilə Yankoviç orta sahəni möhkəmlədə bildi. “Braqa” isə bunu çox səhlənkarcasına etməyə başladı. Həddən artıq top itkiləri və müdafiəyə geri qayıtmamaq bu səbəblərdən biriydi. Bəlkə də Moutinyonun 36 yaşında olması təsir göstərirdi. Yəni geridönüşdə çətinlik çəkirdi. “Qarabağ”ın da çox sürətli əks-hücumlara çıxması qol epizodlarının yaranmasına səbəb oldu. Məncə, 2-ci qol “Braqa”nı tam sındırdı. Çünki rəqib hesabı bərabərləşdirəndən sonra necə olur-olsun, qol vuracaqmış kimi meydana çıxmışdı. Qoldan sonra isə başıalovlu şəkildə topu qabağa atırdılar və hər dəfə də əks-hücumda yaxalanırdılar. Bizim uşaqlar da bu əks-hücumlardan məharətlə yararlandı. Ümumilikdə böyük addım atdığımızı deyə bilərik. “Braqa” zəif komanda deyil. Çünki bu səviyyədə zəif komandalar olmur. Portuqaliya təmsilçisinin Bakıda geridönüş edə biləcəyini düşünmürəm. Fəqət “Qarabağ” evdə əməlli-başlı təzyiq altında oynamalı olacaq. Matçın nəticəsi ikibaşlıdı. “Braqa” kimi komandanın heyətində olan futbolçular üçün 2 topluq fərqi qaytarmaq mümkündü. Özləri də bunu başa düşür. Ancaq bunun üçün böyük qüvvəylə irəli atılmaları lazım gələcək. Ümid edək ki, Bakıda da səhvlərə yol verəcəklər və “Qarabağ”ın qol imkanları yenə də olacaq”.