“Tankenin gedişinin Şeydayevlə heç bir əlaqəsi yoxdu”
Millimizin hücumçusu Ramil Şeydayevin qış “transfer pəncərəsi”ndə Tayland “Buriram Yunayted”indən ayrılaraq Türkiyənin birinci liqa təmsilçisi “Kocaelispor”la anlaşdığını bilirsiz.
Həmin vaxt bu transfer ölkəmizdə böyük əks-səda doğurdu. Elita klubunu aşağı dəstəyə dəyişmək qərarının altında maliyyə mülahizələrinin yatması heç kimə sirr deyildi. Şeydayev Türkiyəyə həm də pul dalınca yollanmışdı... Onun yeni klubuyla müqaviləyə görə cari mövsümün qalan 6 ayı üçün 300 min, növbəti mövsüm üçün isə 550 min avro alacağı deyilirdi. İndi də “Kocaelispor”da məhz Ramilin maaşı üzündən vəziyyətin gərginləşməsi ilə bağlı xəbər həm Türkiyə, həm də Azərbaycan mətbuatını zəbt edib.Belə ki, neçə gün öncə Türkiyə mediasında Ramilin “Kocaelispor”da qazancı hədsiz yüksək olduğuna görə komandanın başqa oyunçularının narazılıq etdiyinə dair xəbərlər yayılıb. Hətta deyilənə görə, forvard Duqlas Tankenin “Kocaelispor”dan ayrılmasının əsas səbəbi də budu. Braziliyalı oyunçu Ramillə eyni maaşı aldığını öyrəndikdən sonra klub rəhbərliyinə “Ramil mənlə eyni məbləği alacaqsa, qoy komandanı o çempion etsin, mən gedirəm” deyib. “Kocaeli Zirve” qəzeti isə bunları yazır:
“Şeydayevin qonorarı əsl problemdi, ona görə də bir çox futbolçu klubu tərk edib. Hamı deyir ki, Taylandda 100 minə oynayan Şeydayev 850 min avroya oynayacaq. Kollektivdə sakitlik yoxdu, hər şey barıt çəlləyinə bənzəyir. Şeydayevin maaşının üçdəbirinə oynayan futbolçuların yaxın gələcəkdə ayrılması təəccüblü deyil. Artıq bunun əlamətlərini "Boluspor" matçında (1:1) görməyə başladıq”.
Tanke “transfer pəncərəsi”nin sonuna iki gün qalmış menecerinin yüksək maaş qarşılığında tapdığı Yaponiya klubuna transfer olunub. “Kocaelispor”la bağlı bu məsələni daha detallı şəkildə öyrənmək üçün “CBC Sport” kanalının və “Sportinfo TV”nin aparıcı eksperti Elçin Cəlilovla əlaqə saxladıq:
“Doğrudu, “Kocaelispor”da məvacibi yüksək olan 3-4 futbolçudan biri də Ramil Şeydayevdi. Məhz bu yüksək məvacib qarşılığında o, Türkiyə 1-ci liqasında oynamağa razılıq verdi. Amma klubun maliyyə problemlərinin olduğu aşkardı. Müəyyən çətinlikləri var. Ödənişlərlə bağlı çətinlik yaşadıqları xəbərini əldə etmişəm. Amma təkcə Ramili saxlayacaq qədər pul ödəyib, digər hücumçunu komandada saxlamaq istəməmək fikri tam yanlışdı. Əldə etdiyim bilgiyə görə, Duqlas Tanke daim oynamaq istəyən biri idi. Ona görə də klubdan ayrıldı. Yəni sırf Ramilə, yüksək məvacibə görə ayrılmayıb. Ancaq bu o demək deyil ki, Ramil alternativsiz futbolçudu. Çünki Ramil davamlılığı yüksək olan oyunçu deyil. Bu reallıqdı və hər şey göz qabağındadı. Yəni Tankenin klubdan ayrılmasını Ramilin maaşı ilə əlaqələndirmək yanlışdı. Sadəcə, futbolçuya yaxşı təklif gəldi, o da klubdan ayrılmağa qərar verdi”.
Bu mövzunu dərinləşdirmək üçün “Kocaelispor”un prezidenti Əngin Koyunla da danışdıq: “Elə bir şey mövzumuz deyil. Tankenin klubla müqaviləsində sərbəst qalmaq maddəsi var idi. Buna görə də klubdan ayrılıb, Yaponiyaya transfer olundu. Bu mövzunun Ramillə heç bir əlaqəsi yoxdu. Digər sualınıza gəlincə, futbolçularımızla maaşla bağlı heç bir sıxıntımız yoxdu”.
Bu mövzunu dərinləşdirmək üçün “Kocaelispor”un prezidenti Əngin Koyunla da danışdıq: “Elə bir şey mövzumuz deyil. Tankenin klubla müqaviləsində sərbəst qalmaq maddəsi var idi. Buna görə də klubdan ayrılıb, Yaponiyaya transfer olundu. Bu mövzunun Ramillə heç bir əlaqəsi yoxdu. Digər sualınıza gəlincə, futbolçularımızla maaşla bağlı heç bir sıxıntımız yoxdu”.
KAMAL SƏFƏR
Digər xəbərlər
